રત્નાગિરી (મહારાષ્ટ્ર) : ક્રિકેટના મેદાન પર દુનિયાભરના બોલરોને હંફાવનાર ‘માસ્ટર બ્લાસ્ટર’ સચિન તેંડુલકર હાલમાં મેદાનની બહાર બાળકોની કમાલ જોઈને આશ્ચર્યચકિત થઈ ગયા છે. મુસાફરી દરમિયાન સચિનની નજર રસ્તાના એક ખૂણામાં રમી રહેલા કેટલાક ગ્રામીણ બાળકો પર પડી, જેઓ કોઈ મોંઘા રમકડાંથી નહીં પણ પોતાની બનાવેલી અનોખી ‘દેશી કાર’ સાથે મસ્તી કરી રહ્યા હતા. આ બાળકોનો ‘એન્જિનિયરિંગ ચમત્કાર’ જોઈ સચિન પોતે રોકાઈ ગયા અને આ અનોખી ક્ષણને કેમેરામાં કેદ કરી લીધી.

શોરૂમની નહીં, કલ્પનાની કમાલ

સચિન તેંડુલકરે સોશિયલ મીડિયા પ્લેટફોર્મ 'X' પર આ વીડિયો શેર કરતા એક ખૂબ જ સુંદર વાત લખી છે. તેમણે જણાવ્યું કે, “ભારતના ઘણા છુપાયેલા ખૂણાઓમાંથી પસાર થતાં અમે એક એવી ‘કાર’ જોવા માટે રોકાયા જે કોઈ શોરૂમમાંથી નહીં, પણ બાળકોની કલ્પનાશક્તિમાંથી આવી હતી. આ એવી પ્રતિભા છે જે સંપૂર્ણ પરિસ્થિતિઓની રાહ જોતી નથી, તે ગમે તે રીતે પોતાનો રસ્તો શોધી જ લે છે. બસ મૌકા મિલના ચાહિયે!”

લાકડીઓ અને પૈડાનો અનોખો સંગમ

વીડિયોમાં જોઈ શકાય છે કે બાળકોએ ખૂબ જ સાધારણ સાધનોનો ઉપયોગ કરીને એક ચાલતી-ફરતી ગાડી બનાવી છે. બે પૈડાંને લાકડીઓ દ્વારા એવી રીતે જોડવામાં આવ્યા છે કે તેના પર એક બાળક આરામથી બેસી શકે અને બીજા બાળકો તેને ધક્કો મારીને અથવા ખેંચીને આગળ લઈ જઈ શકે. આ ડિઝાઇનની ચોકસાઈ અને કલ્પના જોઈને સચિન દંગ રહી ગયા હતા. તેમણે બાળકો સાથે વાતચીત પણ કરી અને તેમની આ ક્રિએટિવિટીને બિરદાવી હતી.

સોશિયલ મીડિયા પર ચાહકોની પ્રતિક્રિયા

સચિનની આ પોસ્ટ સોશિયલ મીડિયા પર જોતજોતામાં વાયરલ થઈ ગઈ છે. હજારો લોકો આ વીડિયોને લાઈક કરી રહ્યા છે અને બાળકોના જુગાડ તથા તેંડુલકરની નમ્રતાના વખાણ કરી રહ્યા છે. ચાહકોનું કહેવું છે કે ભારતના ગ્રામીણ વિસ્તારોમાં આવી અનેક પ્રતિભાઓ છુપાયેલી છે, જેને માત્ર એક તકની જરૂર છે.

ક્રિકેટના ભગવાનની સાદગી

આ ઘટના ફરી એકવાર સાબિત કરે છે કે સચિન તેંડુલકર માત્ર એક મહાન ક્રિકેટર જ નહીં, પણ એક સંવેદનશીલ અને જમીન સાથે જોડાયેલા વ્યક્તિ પણ છે. એક નાનકડી ‘લાકડીની કાર’ માટે પોતાની આલીશાન ગાડી રોકીને બાળકોને પ્રોત્સાહિત કરવા તે ખરેખર પ્રશંસનીય છે.