ન્યૂ જર્સી : દુનિયાની સૌથી મોટી રમતગમતની ઇવેન્ટ એટલે કે FIFA વર્લ્ડ કપ ૨૦૨૬ ની ફાઇનલ મેચ રવિવારે રમાવાની છે, પરંતુ એક અણધારી કુદરતી આફતે આ મહામુકાબલા પર મોટું સસ્પેન્સ ઊભું કરી દીધું છે. કેનેડાના જંગલોમાં લાગેલી ભયાનક આગનો ઝેરી અને ઘાટો ધુમાડો પવનની દિશા સાથે અમેરિકાના આકાશમાં ફેલાઈ ગયો છે. કેનેડામાં યુનાઇટેડ સ્ટેટ્સના રાજદૂત પીટ હોઇકસ્ટ્રાએ સત્તાવાર ચેતવણી આપી છે કે જો હવાની ગુણવત્તા (Air Quality) વધુ જોખમી સ્તરે પહોંચશે, તો અમેરિકી પ્રમુખ ડોનાલ્ડ ટ્રમ્પ રવિવારે રમાનારી ફાઇનલ મેચને મુલતવી રાખવા અથવા મોડી શરૂ કરવા માટેનો આખરી નિર્ણય લઈ શકે છે. ન્યૂ જર્સીમાં ફૂટબોલ જગતના બે દિગ્ગજો—આર્જેન્ટિના અને સ્પેન વચ્ચે ફાઇનલ ટ્રોફી માટે ટક્કર થવાની છે.

ખેલાડીઓની સુરક્ષા એ જ અમારો ગોલ:
કેનેડિયન બ્રોડકાસ્ટર સાથે વાતચીત કરતા યુએસ એમ્બેસેડર પીટ હોઇકસ્ટ્રાએ સ્પષ્ટ કર્યું કે, "જો હવાનું પ્રદૂષણ એટલું ખરાબ થઈ જાય કે જે ખેલાડીઓ કે સ્ટેડિયમમાં હાજર લાખો ચાહકોના સ્વાસ્થ્ય માટે ખતરનાક સાબિત થાય, તો રમતને રોકવાનું કહેનાર સૌથી પહેલા વ્યક્તિ રાષ્ટ્રપતિ ડોનાલ્ડ ટ્રમ્પ પોતે હશે." તેમણે ઉમેર્યું કે ફૂટબોલની વૈશ્વિક ગવર્નિંગ બોડી 'ફિફા' (FIFA) સાથે આ ગંભીર મુદ્દા પર સતત હાઈ-લેવલ ચર્ચાઓ ચાલી રહી છે. કોઈપણ સંજોગોમાં લોકોના જીવ જોખમમાં મૂકીને રમત રમાડવામાં આવશે નહીં.

કુદરતી આપત્તિથી પડોશી દેશો વચ્ચે બમ્પર રાજકીય તણાવ:
આ જંગલની આગે હવે અમેરિકા અને કેનેડા જેવા બે મિત્ર દેશો વચ્ચે મોટો રાજદ્વારી વિવાદ છેડી દીધો છે. પ્રમુખ ડોનાલ્ડ ટ્રમ્પે પોતાના સોશિયલ મીડિયા પ્લેટફોર્મ 'ટ્રુથ સોશિયલ' પર કેનેડા સરકારની આકરી ઝાટકણી કાઢી છે. ટ્રમ્પે કેનેડા પર તેના જંગલો અને ઝાડીઓનું યોગ્ય સંચાલન કરવામાં સદંતર નિષ્ફળ જવાનો આક્ષેપ કર્યો છે. ટ્રમ્પે ગુસ્સામાં લખ્યું કે, "કેનેડાની બેદરકારીને કારણે દર વર્ષે અમેરિકા બિનજરૂરી રીતે ગંદી, પ્રદૂષિત અને બિનઆરોગ્યપ્રદ હવાના આક્રમણનો ભોગ બને છે, જે સંપૂર્ણપણે અસ્વીકાર્ય છે." આ પ્રદૂષણને કારણે અમેરિકાને થઈ રહેલા અબજો ડોલરના નુકસાનની ભરપાઈ કરવા માટે કેનેડામાંથી આવતી વસ્તુઓ પર ભારે ટેરિફ (કર) ઝીંકવાની ધમકી પણ ટ્રમ્પે આપી દીધી છે.

**૯૦૦ થી વધુ જગ્યાએ આગ સક્રિય, ૧૦ કરોડ લોકો પ્રભાવિત:**

પરિસ્થિતિની ગંભીરતાનો અંદાજ એ વાત પરથી લગાવી શકાય છે કે કેનેડિયન વાઇલ્ડલેન્ડ ફાયર ઇન્ફર્મેશન સિસ્ટમ મુજબ, કેનેડામાં હાલમાં ૯૦૪ સક્રિય જંગલની આગ ધગી રહી છે, જેમાંથી ૧૨૯ આગ સંપૂર્ણપણે આઉટ ઓફ કંટ્રોલ (નિયંત્રણ બહાર) છે. શુક્રવારે જ વધુ ૯૮ નવી જગ્યાએ આગ ફાટી નીકળી હતી. પશ્ચિમ ઓન્ટારિયોના જંગલોમાંથી નીકળતો ભારે ધુમાડો સરહદ પાર કરીને અમેરિકામાં ઘૂસી રહ્યો છે, જેના કારણે યુએસના લગભગ ૧૦ કરોડ રહેવાસીઓ પ્રદૂષિત હવાનો સામનો કરી રહ્યા છે. રમતગમતના ઇતિહાસમાં આ એક દુર્લભ ક્ષણ છે, જ્યાં વિશ્વની સૌથી મોટી ટૂર્નામેન્ટ પર પર્યાવરણીય કટોકટી અને આંતરરાષ્ટ્રીય રાજકારણનો પડછાયો પડ્યો છે. હાલ પૂરતી ફાઇનલ મેચ શિડ્યુલ મુજબ છે, પરંતુ હવામાન વિભાગ અને ફિફાની નજર પલ-પલના રિપોર્ટ પર છે.