ફ્લોરિડા : રમતગમત જગતમાંથી એક અત્યંત દુઃખદ અને હચમચાવી નાખનારા સમાચાર સામે આવ્યા છે. પૂર્વ એનએફએલ સ્ટાર અને પ્રખ્યાત ફૂટબોલ ખેલાડી અલ્ફોન્સો સ્મિથ જુનિયરનું અવસાન થયું છે. પ્રાપ્ત અહેવાલો અનુસાર, માત્ર 40 વર્ષની વયે અલ્ફોન્સો સ્મિથ જુનિયરે બુધવારે ફ્લોરિડાના એક રહેણાંક વિસ્તારમાં કથિત રીતે આત્મહત્યા કરી લીધી છે. આ અચાનક બનેલી દુર્ઘટનાથી તેમના ચાહકો અને પરિવારજનો શોકમાં ડૂબી ગયા છે. તેમની આ અચાનક વિદાયથી રમત જગતમાં શોકનું મોજુ ફરી વળ્યું છે.

પોતાનું જીવન ટૂંકાવતા પહેલા અલ્ફોન્સો સ્મિથ જુનિયરે સોશિયલ મીડિયા પર એક ખૂબ જ ભાવનાત્મક અને દર્દનાક નોટ શેર કરી હતી. તેમની આ અંતિમ ફેસબુક પોસ્ટમાં તેમણે માનસિક અને ભાવનાત્મક સંઘર્ષો વિશે ખુલીને વાત કરી હતી. તેમણે પોતાના પરિવાર, માતા અને ભાઈ-બહેનોની માફી માંગતા લખ્યું કે તેઓ પોતાના અંદરના રાક્ષસો સામે લડવા માટે બનતા તમામ પ્રયાસો કરી રહ્યા હતા. તેમણે પોતાના બાળપણના કેટલાક દર્દનાક અનુભવોનો પણ ઉલ્લેખ કર્યો હતો અને જણાવ્યું હતું કે તેમને મદદની જરૂર હતી પરંતુ તે મળી શકી ન હતી.

તેમણે પોતાની પોસ્ટમાં લખ્યું હતું કે તેઓ કોઈને નિરાશ કરવા માંગતા ન હતા પરંતુ પરિસ્થિતિઓ એવી બની ગઈ હતી. આ પોસ્ટ સામે આવ્યા બાદ સોશિયલ મીડિયા પર ચર્ચા શરૂ થઈ ગઈ હતી અને થોડી જ વારમાં તેમના મૃત્યુના સમાચાર આવ્યા. હાલમાં સમગ્ર મામલે પોલીસ અને તપાસ એજન્સીઓ દ્વારા વધુ તપાસ હાથ ધરવામાં આવી રહી છે જેથી મૃત્યુના ચોક્કસ કારણો જાણી શકાય.

અલ્ફોન્સો સ્મિથ જુનિયરની શાનદાર કારકિર્દીની વાત કરીએ તો, તેમણે કોલેજ ફૂટબોલ ઇતિહાસમાં ઉત્કૃષ્ટ પ્રદર્શન કર્યું હતું. વર્ષ 2009ના એનએફએલ ડ્રાફ્ટમાં ડેન્વર બ્રોન્કોસ દ્વારા તેમની પસંદગી કરવામાં આવી હતી. બાદમાં તેઓ ટ્રેડ થઈને ડેટ્રોઇટ લાયન્સ ટીમ સાથે જોડાયા હતા અને વર્ષ 2012ના સત્ર સુધી તે ટીમ સાથે રહ્યા હતા. પોતાની વ્યવસાયિક કારકિર્દી દરમિયાન તેમણે એનએફએલની 42 નિયમિત સત્રની મેચોમાં ભાગ લીધો હતો.