સાઉથમ્પ્ટન : ઈંગ્લેન્ડની કાઉન્ટી ક્રિકેટ ક્લબ હેમ્પશાયરે ન્યૂઝીલેન્ડના અનુભવી સીમ-બોલિંગ ઓલરાઉન્ડર સ્કોટ કુગેલેઇજન સાથેનો તેનો કરાર તાત્કાલિક અસરથી રદ કરવાની જાહેરાત કરી છે. ચાલુ કાઉન્ટી ચેમ્પિયનશિપની બાકીની મેચો માટે ૩૪ વર્ષીય કુગેલેઇજન સાથે કરાર કરવાની તૈયારી દર્શાવતા જ ક્લબના સમર્થકો, ચાહકો અને સ્ટાફ તરફથી તીવ્ર આક્રોશ જોવા મળ્યો હતો, જેના પગલે ક્લબને આ નિર્ણય પાછો ખેંચવાની ફરજ પડી છે.

રોઝ બાઉલ ખાતે વોરવિકશાયર સામેની ડિવિઝન-૧ મેચ માટે સ્કોટ કુગેલેઇજનનું નામ સામે આવતા જ સોશિયલ મીડિયા પર ચાહકોએ ભારે ટીકા કરી હતી અને તેને ક્લબ માટે 'શરમજનક' ગણાવ્યું હતું. વિરોધને ધ્યાનમાં રાખીને, હેમ્પશાયરે મેચ શરૂ થવાના માંડ પાંચ મિનિટ પહેલા જ એક સત્તાવાર નિવેદન જારી કરીને કુગેલેઇજન સાથેનો કરાર રદ કરવાની પુષ્ટિ કરી હતી.

૨૦૧૫ ની ઘટના અને વિવાદની પૃષ્ઠભૂમિ

ન્યૂઝીલેન્ડ માટે તમામ ત્રણેય ફોર્મેટમાં રમી ચૂકેલા કુગેલેઇજન પર ૨૦૧૫ માં બનેલી એક ઘટના બાદ ૨૦૧૬ અને ૨૦૧૭ માં બળાત્કારનો કેસ ચાલ્યો હતો. પ્રથમ ટ્રાયલમાં જ્યુરી કોઈ નિર્ણય પર પહોંચી શકી ન હતી, જ્યારે બીજી ટ્રાયલમાં તેને નિર્દોષ જાહેર કરવામાં આવ્યો હતો. જોકે, આ કેસ બાદ જ્યારે પણ તેની સ્થાનિક કે આંતરરાષ્ટ્રીય ટીમમાં પસંદગી થઈ છે, ત્યારે અવારનવાર વિરોધનો સામનો કરવો પડ્યો છે.

હેમ્પશાયરે પોતાના નિવેદનમાં જણાવ્યું હતું કે, "અમારા સ્ટાફ અને સમર્થકોના મંતવ્યો અને ભાવનાઓનું સન્માન કરીને અમે આ નિર્ણય લીધો છે." ઉલ્લેખનીય છે કે, હેમ્પશાયર હાલમાં કાઉન્ટી ચેમ્પિયનશિપ ડિવિઝન-૧ માં પોઈન્ટ ટેબલમાં સૌથી નીચે છે અને રેલીગેશનથી બચવા માટે સંઘર્ષ કરી રહ્યું છે. વિદેશી ખેલાડીનો કરાર રદ થતાં ટીમ હવે કોઈપણ વિદેશી ખેલાડી વિના અંતિમ ચાર મેચો રમશે.