રાજકોટ : 2026 FIFA વર્લ્ડ કપમાં એક એવો અકલ્પનીય રેકોર્ડ સર્જાયો છે જેણે ફૂટબોલ પ્રેમીઓને રોમાંચિત કરી દીધા છે. વર્લ્ડ કપના 96 વર્ષના ઇતિહાસમાં પ્રથમ વખત વિશ્વની ટોચની ચાર ક્રમાંકિત ટીમો - ફ્રાન્સ (નંબર 1), આર્જેન્ટિના (નંબર 2), સ્પેન (નંબર 3) અને ઇંગ્લેન્ડ (નંબર 4) સેમિફાઇનલ સુધી પહોંચવામાં સફળ રહી છે. ક્વાર્ટર ફાઇનલમાં ફ્રાન્સ, સ્પેન, ઇંગ્લેન્ડ અને આર્જેન્ટિનાએ પોતપોતાના હરીફોને હરાવીને ટાઇટલ જીતવા માટે અંતિમ ચારમાં સ્થાન સુરક્ષિત કર્યું છે.

આ ઐતિહાસિક સફળતા પાછળ FIFA ના નવા ડ્રો નિયમ, 'ક્વાડ્રન્ટ સેપરેશન'નું મહત્વનું યોગદાન છે. આ નિયમ હેઠળ ટોચની ચાર ટીમોને અલગ-અલગ ક્વાડ્રન્ટમાં મૂકવામાં આવી હતી, શરત એ હતી કે તેમણે પોતપોતાના ગ્રુપમાં ટોચનું સ્થાન મેળવવું પડે. આ વ્યૂહરચનાના કારણે આ દિગ્ગજ ટીમો સેમિફાઇનલ પહેલા એકબીજા સામે ટકરાઈ નહીં, જેનું પરિણામ આજે વિશ્વ ફૂટબોલની ચાર સૌથી શક્તિશાળી ટીમો વચ્ચેની ટક્કર તરીકે સામે આવ્યું છે.

સેમિફાઇનલના શેડ્યૂલ મુજબ, 15 જુલાઈના રોજ ફ્રાન્સ અને સ્પેન વચ્ચે ડલ્લાસમાં મુકાબલો થશે, જ્યારે 16 જુલાઈના રોજ ઇંગ્લેન્ડ અને આર્જેન્ટિના એટલાન્ટામાં ટકરાશે. ભારતીય સમય મુજબ આ બંને મેચો મોડી રાત્રે 12:30 વાગ્યે શરૂ થશે. ફ્રાન્સ તરફથી કાયલિયન એમબાપ્પેનું શાનદાર ફોર્મ અને આર્જેન્ટિના તરફથી મેસ્સીનો અનુભવ ટીમો માટે પ્લસ પોઈન્ટ સાબિત થઈ રહ્યા છે.

આ ટૂર્નામેન્ટ હવે તેના સૌથી નિર્ણાયક અને ઉચ્ચ ગુણવત્તાવાળા તબક્કે છે. છેલ્લે 1994 થી 2022 સુધીના આઠ વર્લ્ડ કપમાં ક્યારેય આવું બન્યું નહોતું કે ટોચની ક્રમાંકિત ટીમો ટકી શકી હોય, કારણ કે હંમેશા કોઈ ને કોઈ મોટો અપસેટ જોવા મળતો હતો. હવે ફૂટબોલ જગતની નજર આ ટીમો વચ્ચેના મહાસંગ્રામ પર છે, જે ફૂટબોલના નવા ઈતિહાસનું નિર્માણ કરશે.