ચાંગવોન :દક્ષિણ કોરિયાના ચાંગવોનમાં યોજાઈ રહેલી વિશ્વ પેરા નિશાનેબાજી સ્પર્ધાના પ્રારંભિક દિવસે ભારતીય ખેલાડીઓએ એક સુવર્ણ, બે રજત અને એક કાંસ્ય સહિત ચાર ચંદ્રકો જીતી ધમાકેદાર શરૂઆત કરી છે. મહિલા દસ મીટર એર રાઇફલ સ્ટેન્ડિંગ એસએચ-૧ સ્પર્ધામાં મોના અગ્રવાલે રજત ચંદ્રક જીત્યો હતો. આ સિદ્ધિ સાથે મોનાએ લોસ એન્જલસ ખાતે યોજાનારી વર્ષ ૨૦૨૮ની પેરાલિમ્પિક સ્પર્ધાનો ક્વોટા પણ મેળવ્યો છે.
આ જ વ્યક્તિગત સ્પર્ધામાં પેરાલિમ્પિક વિજેતા અવની લેખરાએ કાંસ્ય ચંદ્રક પોતાના નામે કર્યો હતો. મોના અગ્રવાલ, અવની લેખરા અને મિલી શાહની ભારતીય ત્રિપુટીએ સંયુક્ત પ્રદર્શનના આધારે મહિલા ટીમ સ્પર્ધાનો સુવર્ણ ચંદ્રક જીતી તિરંગો સર્વોચ્ચ સ્થાને લહેરાવ્યો હતો.
પુરુષોની દસ મીટર એર રાઇફલ સ્ટેન્ડિંગ એસએચ-૧ ટીમ સ્પર્ધામાં રાકેશ નિદાગુંડી, આનંદ કૃષ્ણ અને સ્વરૂપ ઉનહાલકરની ત્રિપુટીએ રજત ચંદ્રક મેળવ્યો હતો. આમ પ્રથમ દિવસની સ્પર્ધાઓ પૂર્ણ થતાં ભારતના ખાતામાં કુલ ચાર ચંદ્રકો નોંધાયા હતા.
મોના અને અવનીએ એક જ વ્યક્તિગત સ્પર્ધામાં અનુક્રમે રજત અને કાંસ્ય જીતતાં ભારતનો દબદબો સર્જાયો હતો. ટીમ સુવર્ણમાં મિલી શાહનું પ્રદર્શન પણ નિર્ણાયક રહ્યું હતું. વિશ્વ સ્પર્ધાની શરૂઆતમાં મળેલી આ સફળતાએ આગામી મુકાબલાઓ માટે ભારતીય દળનો આત્મવિશ્વાસ બુલંદ કર્યો છે