નવી દિલ્હી, તા.28: શ્રીલંકા સામે રમાનારી બે ટેસ્ટ મેચોની મહત્વપૂર્ણ શ્રેણી માટે ભારતીય ક્રિકેટ કંટ્રોલ બોર્ડ (BCCI) દ્વારા ૧૫ સભ્યોની ભારતીય ક્રિકેટ ટીમની જાહેરાત કરવામાં આવી છે. આ ટીમમાં અનુભવી અને ધુરંધર ઓલરાઉન્ડર રવિન્દ્ર જાડેજા ની ટીમમાં વાપસી થઈ છે, જે ભારતીય સ્પિન અને મધ્યમ ક્રમના બેટિંગ આક્રમણને ભારે મજબૂતી આપશે. આ ઉપરાંત સ્થાનિક ક્રિકેટમાં સતત સારું પ્રદર્શન કરનાર ઓલરાઉન્ડર સારાંશ  જૈન ને પ્રથમ વખત રાષ્ટ્રીય ટીમમાં સ્થાન આપીને મોટી સરપ્રાઇઝ આપવામાં આવી છે.
WTC ચક્ર માટે મહત્વનો પ્રવાસ: ગાલે અને કોલંબોમાં ખેલાશે જંગ
આગામી શ્રીલંકા પ્રવાસ આઈસીસી વર્લ્ડ ટેસ્ટ ચેમ્પિયનશિપ (WTC) ની દ્રષ્ટિએ ભારત માટે ખૂબ જ મહત્વપૂર્ણ માનવામાં આવે છે. શ્રેણીનો પ્રથમ ટેસ્ટ મુકાબલો ૧૫ થી ૧૯ ઓગસ્ટ દરમિયાન ગાલે ખાતે ખેલાશે, જ્યારે બીજી અને આખરી ટેસ્ટ મેચ ૨૩ થી ૨૭ ઓગસ્ટ દરમિયાન કોલંબો (SSC) ખાતે રમાશે.
બુમરાહ અને સુધરસનની ઉપલબ્ધતા ફિટનેસ પર આધારિત
ટીમમાં ભારતના પ્રમુખ ઝડપી બોલર જસપ્રીત બુમરાહ અને યુવા બેટ્સમેન બી. સાઈ સુધરસનનો સમાવેશ તો કરવામાં આવ્યો છે, પરંતુ તેમની ઉપલબ્ધતા સંપૂર્ણપણે 'BCCI ના સેન્ટર ઓફ એક્સેલન્સ' (CoE) તરફથી મળનારા ફિટનેસ ક્લિયરન્સ પર નિર્ભર રહેશે. બીજી તરફ, ઇંગ્લેન્ડના સીમિત ઓવરોના પ્રવાસ દરમિયાન ઇજાગ્રસ્ત થયેલો ઓલરાઉન્ડર વોશિંગ્ટન સુંદર આ શ્રેણી માટે ઉપલબ્ધ થઈ શક્યો નથી, જે જગ્યા હવે સારાંશ  જૈનને મળી છે.
🏏 શ્રીલંકા પ્રવાસ માટે પસંદ કરાયેલી ૧૫ સભ્યોની ભારતીય ટીમ:
•    શુભમન ગિલ (કેપ્ટન)
•    કે.એલ. રાહુલ (વાઈસ કેપ્ટન)
•    યશસ્વી જયસ્વાલ
•    ઋષભ પંત (વિકેટકીપર)
•    ધ્રુવ જુરેલ (વિકેટકીપર)
•    રવિન્દ્ર જાડેજા
•    કુલદીપ યાદવ
•    સારાંશ  જૈન
•    માનવ સુથાર
•    મોહમ્મદ સિરાજ
•    પ્રસિદ્ધ કૃષ્ણા
•    ગુરનૂર બ્રાર
•    દેવદત્ત પડિક્કલ
•    સાઈ સુધરસન* (ફિટનેસ ક્લિયરન્સને આધીન)
•    જસપ્રીત બુમરાહ* (ફિટનેસ ક્લિયરન્સને આધીન)