વડોદરા : ગુજરાતના વડોદરા ખાતે રમાયેલી પ્રથમ વન-ડે (ODI) ક્રિકેટ મેચમાં ભારતીય મહિલા ટીમની ખેલાડીઓએ બેટિંગ અને બોલિંગ બંને ક્ષેત્રે પરાક્રમ દાખવતા ઝિમ્બાબ્વેની ટીમને ૯ વિકેટે ધૂળ ચટાડી છે. મેચમાં શાનદાર પ્રદર્શન કરતા શ્રી ચરનીએ કારકિર્દીનું સર્વશ્રેષ્ઠ પ્રદર્શન નોંધાવતા માત્ર ૨૩ રન આપીને ૪ વિકેટ ઝડપી હતી, જ્યારે ક્રાંતિ ગૌડે ૩ વિકેટ મેળવી હતી. આ ઘાતક બોલિંગ આક્રમણને કારણે ઝિમ્બાબ્વેની પૂરી ટીમ ૪૯.૫ ઓવરમાં ૧૯૭ રનમાં ઓલઆઉટ થઈ ગઈ હતી. ઝિમ્બાબ્વે તરફથી બિલોવ્ડ બિઝાએ સૌથી વધુ ૬૨ રનનું યોગદાન આપ્યું હતું.

વિજય માટેના ૧૯૮ રનના લક્ષ્યાંકનો પીછો કરવા ઉતરેલી ભારતીય ટીમની શરૂઆત અત્યંત મજબૂત રહી હતી. ઓપનર પ્રતિકા રાવલ અને સ્મૃતિ મંધાનાએ શાનદાર બેટિંગ કરતા પ્રથમ વિકેટ માટે ૯૪ રનની ભાગીદારી નોંધાવી હતી. સ્મૃતિ મંધાના ૩૨ રન બનાવીને આઉટ થયા બાદ મેદાન પર આવેલી વિસ્ફોટક બેટર શેફાલી વર્માએ સિક્સરોની રમઝટ બોલાવી દીધી હતી. પ્રતિકા રાવલે ૯૬ બોલમાં અણનમ ૧૦૦ રન ફટકારીને પોતાની કારકિર્દીની ત્રીજી વન-ડે સદી પૂરી કરી હતી, જ્યારે શેફાલી વર્માએ માત્ર ૩૩ બોલમાં જ અણનમ ૬૪ રનની તોફાની ઇનિંગ રમી હતી. આ બંને બેટરોની અજેય ભાગીદારીના જોરે ભારતે માત્ર ૨૭.૧ ઓવરમાં જ ૧ વિકેટ ગુમાવીને ૨૦૦ રન બનાવી લીધા હતા અને મેચ આસાનીથી જીતી લીધી હતી.