ટોકાઈ (જાપાન): જાપાનના આઈચી-નાગોયા ખાતે ચાલી રહેલી એશિયન ગેમ્સ ૨૦૨૬માં ભારતીય ખેલાડીઓ શાનદાર પ્રદર્શન કરી રહ્યા છે. સોમવારે ટોકાઈ સિટીઝન્સ જિમ્નેશિયમ ખાતે રમાયેલી ગ્રુપ 'એ'ની રોમાંચક શરૂઆતની મેચમાં ભારતીય મહિલા કબડ્ડી ટીમે બાંગ્લાદેશ સામે ૪૨-૨૧થી એકતરફી અને પ્રભાવશાળી વિજય મેળવીને પોતાના ટાઇટલને બચાવવાની સફરનો વિજયી પ્રારંભ કર્યો છે. મેચની પહેલી જ મિનિટથી ભારતીય ટીમે શિસ્તબદ્ધ રક્ષણાત્મક વ્યૂહરચના અને આક્રમક દબાણ બનાવીને બાંગ્લાદેશી ખેલાડીઓને હંફાવી દીધા હતા.

મેચની શરૂઆતથી જ ભારતે મેદાન પર પોતાનું વર્ચસ્વ જમાવી લીધું હતું. ભારતીય રેડર્સે બાંગ્લાદેશ માટે બોનસ લાઇન સુધી પહોંચવું પણ મુશ્કેલ બનાવી દીધું હતું. સંજુ દેવીએ આક્રમણમાં શાનદાર પ્રદર્શન કરતા મહત્વપૂર્ણ પોઈન્ટ્સ અપાવ્યા હતા, જ્યારે મનીષા કુમારીએ 'લેફ્ટ કવર' પોઝિશન પર અદ્ભુત રમત બતાવી હતી. સોનાલી શિંગાટે અને કેપ્ટન પુષ્પા રાણાએ પણ સાથ આપતા ભારતે શાનદાર 'ઓલ-આઉટ' મેળવીને હાફ-ટાઇમ સુધીમાં ૨૧-૧૦ની મજબૂત સરસાઈ મેળવી લીધી હતી.

બીજા હાફમાં પણ જાળવી રાખી ગતિ, હવે ઈરાન સામે ખરાખરીનો જંગ

મેચના બીજા હાફમાં પણ ભારતીય ટીમે પોતાની આક્રમક ગતિ જાળવી રાખી હતી. સંજુ દેવી અને પૂજાએ ઝડપી 'હેન્ડ ટચ' દ્વારા સતત પોઈન્ટ્સ મેળવ્યા હતા. જોકે, બાંગ્લાદેશની કેપ્ટન શ્રબોની મલિકે થોડો વળતો સંઘર્ષ કરવાનો પ્રયાસ કર્યો હતો અને મેચ પૂરી થવાની પાંચ મિનિટ પહેલા અંતર ઘટાડવાની કોશિશ કરી હતી, પરંતુ સંજુ દેવીએ શાનદાર રેડ્સની શ્રેણી રચીને ભારતની સ્થિતિ ફરી મજબૂત કરી દીધી હતી. ભારતના કુલ ૪૨ પોઈન્ટ્સમાં ૧૧ બોનસ પોઈન્ટ્સ અને ચાર 'ઓલ-આઉટ' પોઈન્ટ્સ સામેલ હતા. આ ભવ્ય જીત સાથે અભિયાન શરૂ કરનાર ભારતીય મહિલા ટીમ હવે આગામી ૨૩ સપ્ટેમ્બરના રોજ સવારે ૮:૩૦ વાગ્યે મજબૂત ઈરાની ટીમ સામે પોતાની આગામી મેચ રમવા માટે મેદાનમાં ટકરાશે.