નવી દિલ્હી: પિકલબોલ વર્લ્ડ કપમાં ભારત ચોથા સ્થાને રહ્યું. વિયેતનામના દા નાંગમાં યોજાયેલી સ્પર્ધામાં ભારતીય ટીમે કુલ 41 મેડલ (7 ગોલ્ડ, 17 સિલ્વર અને 17 બ્રોન્ઝ) જીત્યા હતા. ગયા વર્ષે ભારતીય ટીમ સાતમા સ્થાને રહી હતી. 48 ખેલાડીઓએ દેશનું ગૌરવ વધારવા માટે પોતાનું શ્રેષ્ઠ પ્રદર્શન કર્યું હતું. વર્લ્ડ કપમાં ભારતનું પ્રતિનિધિત્વ કરતા ખેલાડીઓએ કિડ્સ, જુનિયર્સ, ઓપન, સિનિયર્સ અને માસ્ટર્સ ટીમ ઇવેન્ટ્સમાં ભાગ લીધો હતો. 130 થી વધુ ખેલાડીઓએ વ્યક્તિગત કેટેગરીમાં પણ ભાગ લીધો હતો. કિડ્સ ટીમનો સિલ્વર મેડલ જીતવો એ વર્લ્ડ કપમાં ભારતની સૌથી મોટી સિદ્ધિ હતી. ટીમનું નેતૃત્વ વીર શાહ દ્વારા કરવામાં આવ્યું હતું, જેમાં વિરંશ ચોપરા, અરિન બલ્લાની, મહિકા રાઠોડ, માનસી કાર્તિક, આશ્રિતા એસ, કવીર મહેતા અને પ્રાર્થના મોતિયાનીનો સમાવેશ થતો હતો. ભારતીય કેપ્ટનને બાળકોની શ્રેણીમાં શ્રેષ્ઠ કેપ્ટન તરીકે પણ સન્માનિત કરવામાં આવ્યા હતા.ક્વાર્ટર ફાઇનલમાં મજબૂત વિયેતનામી ટીમ સામે હાર્યા બાદ ભારતીય જુનિયર ટીમ ચોથા સ્થાને રહી. અર્જુન સિંહે ભારતીય જુનિયર ટીમનું નેતૃત્વ કર્યું હતું, જેમાં આદિત્ય સિંહ, દેવ શાહ, પૂર્વાંશ પટેલ, વિવાન પટેલ, નાઓમી અમલસાદીવાલા, આશ્રિતા રાજુ અને દિયા મટ્ટીપતિનો પણ સમાવેશ થતો હતો.ભારતીય ઓપન ટીમ ક્વાર્ટર ફાઇનલમાં યુએસએ ટીમ સામે 2-4થી હારી ગઈ હતી, જેના કારણે વર્લ્ડ કપના અંતિમ રાઉન્ડના એક દિવસ પહેલા તેમના અભિયાનનો અંત આવ્યો હતો. હર્ષ મહેતાએ ભારતીય ઓપન ટીમનું નેતૃત્વ કર્યું હતું, જેમાં અર્જુન સિંહ, અનિશ ફ્રોલિયન, અમન પટેલ, નાઓમી અમલસાદીવાલા, પર્લ અમલસાદીવાલા, મિહિકા યાદવ અને આલિયા ઇબ્રાહિમનો પણ સમાવેશ થતો હતો.