મસ્કત (ઓમાન), તા.૨૧: હોકીના મેદાનમાંથી ભારતીય રમતપ્રેમીઓ માટે ઉત્સાહવર્ધક સમાચાર સામે આવ્યા છે. ઓમાનના મસ્કત શહેર ખાતે શરૂ થયેલી પ્રતિષ્ઠિત 'FIH યુથ હોકી5s એશિયન ચેમ્પિયનશિપ ૨૦૨૬' માં ભારતીય સબ-જુનિયર પુરુષ અને મહિલા બંને ટીમોએ વિજયી શંખનાદ કરીને ટુર્નામેન્ટમાં વિજયી પ્રારંભ કર્યો છે.

આંતરરાષ્ટ્રીય સ્તરે રમાઈ રહેલી આ ટુર્નામેન્ટના પ્રથમ દિવસે ભારતીય મહિલા ટીમે પોતાની વિસ્ફોટક રમતથી કઝાકિસ્તાનની ટીમને ૮-૩ ની મસમોટી સરસાઈથી હરાવી હતી. ભારત તરફથી દિયાએ શાનદાર રમત દાખવતા હેટ્રિક નોંધાવી હતી, જ્યારે સંદીપ કુમારી અને નૌશીન નાઝે ૨-૨ ગોલ કરીને ટીમની જીત સરળ બનાવી હતી. આ સિવાય નીલમ ટોપનોએ પણ ૧ ગોલ કરીને સ્કોરબોર્ડમાં પોતાનું નામ નોંધાવ્યું હતું.

પુરુષ ટીમે બાંગ્લાદેશને ૭-૩ થી હરાવ્યું

બીજી તરફ, ભારતીય પુરુષ ટીમે પણ પોતાની શરૂઆતી મેચમાં જ આક્રમક વલણ અપનાવતા બાંગ્લાદેશને ૭-૩ થી પરાજય આપ્યો હતો. કેપ્ટન કેતન કુશવાહાના આગેવાની હેઠળ રાહુલ યાદવ, કરણ ગૌતમ, રોમિત પાલ અને પ્રહલાદ રાજભરે શાનદાર ફિલ્ડ ગોલ કરીને આખી મેચ દરમિયાન વર્ચસ્વ જાળવી રાખ્યું હતું.

તમને જણાવી દઈએ કે, આ બંને ભારતીય ટીમોને પુરુષ અને મહિલા સ્પર્ધાના એલીટ પૂલ (Elite Pool) માં સ્થાન આપવામાં આવ્યું છે. આ ટુર્નામેન્ટ માત્ર એશિયન ચેમ્પિયનશિપ નથી, પરંતુ આગામી પ્રથમ 'FIH યુવા હોકી 5s વર્લ્ડ કપ' માટે ક્વોલિફાયર પણ છે, જેના કારણે ભારતની આ જીત વર્લ્ડ કપના સપના તરફ એક મહત્વપૂર્ણ પગલું માનવામાં આવી રહ્યું છે.