જકાર્તા (ઇન્ડોનેશિયા): જકાર્તા ખાતે રમાઈ રહેલી પ્રતિષ્ઠિત ઇન્ડોનેશિયા ઓપન સુપર 1000 બેડમિન્ટન ટુર્નામેન્ટમાં આજે ભારતીય ખેલાડીઓ માટે મિશ્ર પરિણામો રહ્યા હતા. ભારતના ઉભરતા સિંગલ્સ ખેલાડી આયુષ શેટ્ટીએ શાનદાર લડાયક મિજાજ દર્શાવતા ચીનના મજબૂત ખેલાડી વેંગ હોંગ યાંગને 8-21, 22-20, 21-15 થી પરાજય આપી બીજા રાઉન્ડમાં પ્રવેશ કર્યો છે. આ ઉપરાંત, મિશ્ર ડબલ્સમાં પણ ભારતીય જોડી રોહન કપૂર અને રૂત્વિકા ગડ્ડેએ ચાઇનીઝ તાઈપેઈના પ્રતિસ્પર્ધીઓને 21-14, 21-14 થી સીધા સેટમાં હરાવી જીતનો સિલસિલો જાળવી રાખ્યો હતો.
સાત્વિક-ચિરાગની જોડી માટે આઘાતજનક દિવસ
ભારતીય બેડમિન્ટન માટે આજે એક દુઃખદ ઘટના બની હતી. મેન્સ ડબલ્સમાં વિશ્વની ટોચની જોડી સાત્વિકસાઈરાજ રંકીરેડ્ડી અને ચિરાગ શેટ્ટી મલેશિયાના કાંગ મીન હ્યુક અને મેન વેઈ ચોંગ સામે રમી રહ્યા હતા. મેચ દરમિયાન સાત્વિકસાઈરાજને ઈજા થતાં, ભારતીય જોડીને અધવચ્ચેથી 'રિટાયર્ડ હર્ટ' થઈને બહાર થવું પડ્યું હતું. આ સાથે જ, મેન્સ સિંગલ્સમાં અનુભવી ખેલાડી એચ.એસ. પ્રણોય પણ આયર્લેન્ડના ન્હાટ ન્ગુયેન સામે ત્રણ ગેમ સુધી ચાલેલા સંઘર્ષ બાદ હારીને ટુર્નામેન્ટમાંથી બહાર થઈ ગયા છે.
ઉન્નતી હુડા પર હવે તમામની નજર
હવે ટુર્નામેન્ટમાં ભારતીય અભિયાનને આગળ વધારવાની જવાબદારી મહિલા સિંગલ્સ ખેલાડી ઉન્નતી હુડાના ખભા પર છે. આજે સાંજે તે જાપાનની પૂર્વ વર્લ્ડ ચેમ્પિયન નોઝોમી ઓકુહારા સામે ટકરાશે. ઉન્નતી હુડાના આ મુકાબલા પર ભારતીય બેડમિન્ટન પ્રેમીઓની ખાસ નજર રહેશે, કારણ કે તે એક મજબૂત વિરોધી સામે પોતાના કૌશલ્યની કસોટી કરશે.