ચેન્નાઈIPL 2026ની રવિવારની મેચમાં લખનૌ સુપર જાયન્ટ્સના ઓસ્ટ્રેલિયન બેટ્સમેન જોશ ઇંગ્લિસે ચેન્નાઈ સુપર કિંગ્સ સામે આક્રમક બેટિંગનું પ્રદર્શન કરીને સૌને સ્તબ્ધ કરી દીધા હતા. ચેન્નાઈના ચેપોક સ્ટેડિયમમાં રમાયેલી આ મેચમાં ઇંગ્લિસે માત્ર 33 બોલમાં 10 ચોગ્ગા અને 6 ગગનચુંબી છગ્ગાની મદદથી 85 રન ફટકાર્યા હતા. જોકે, તે પોતાની સદી પૂરી કરવામાં માત્ર 15 રનથી ચૂકી ગયો હતો, પરંતુ તેની આ ઈનિંગે અનેક મોટા રેકોર્ડ્સ તોડી નાખ્યા છે.

પાવરપ્લેમાં મચાવી તબાહી

લખનૌની ઈનિંગની શરૂઆતથી જ જોશ ઇંગ્લિસ આક્રમક મૂડમાં જણાતો હતો. તેણે પાવરપ્લેની પ્રથમ 6 ઓવરમાં જ માત્ર 25 બોલનો સામનો કરીને 77 રન ઝૂડી કાઢ્યા હતા. ઇંગ્લિસની આ તોફાની બેટિંગના પ્રતાપે લખનૌ સુપર જાયન્ટ્સે પાવરપ્લેમાં 91/1નો જંગી સ્કોર ઊભો કર્યો હતો. એક સમયે એવું લાગતું હતું કે તે આઈપીએલ ઇતિહાસની સૌથી ઝડપી સદી ફટકારશે, પરંતુ 10મી ઓવરમાં જેમી ઓવરટને તેની ઈનિંગનો અંત લાવ્યો હતો.

એડમ ગિલક્રિસ્ટનો રેકોર્ડ તોડ્યો

આ ઈનિંગ સાથે જ જોશ ઇંગ્લિસે આઈપીએલ મેચના પાવરપ્લેમાં સૌથી વધુ રન બનાવનારા ખેલાડીઓની યાદીમાં ચોથું સ્થાન મેળવી લીધું છે. તેણે પૂર્વ દિગ્ગજ એડમ ગિલક્રિસ્ટનો વર્ષ 2009નો રેકોર્ડ તોડ્યો છે, જેમાં ગિલક્રિસ્ટે 74 રન બનાવ્યા હતા. આ યાદીમાં હજુ પણ સુરેશ રૈના 87 રન સાથે મોખરે છે. રૈનાએ વર્ષ 2014માં પંજાબ સામે આ સિદ્ધિ મેળવી હતી.

IPL પાવરપ્લેમાં સૌથી વધુ રન બનાવનાર ટોપ પ્લેયર્સ:

  સુરેશ રૈના: 87 રન (વિરુદ્ધ પંજાબ, 2014)

  ટ્રેવિસ હેડ: 84 રન (વિરુદ્ધ દિલ્હી, 2024)

  ફ્રેઝર મેકગર્ક: 78 રન (વિરુદ્ધ મુંબઈ, 2024)

  જોશ ઇંગ્લિસ: 77 રન (વિરુદ્ધ ચેન્નાઈ, 2026)

  એડમ ગિલક્રિસ્ટ: 74 રન (વિરુદ્ધ દિલ્હી, 2009)

  પ્રભસિમરન સિંહ: 71 રન (વિરુદ્ધ દિલ્હી, 2026)

  અભિષેક શર્મા: 66 રન (વિરુદ્ધ પંજાબ, 2026)

ઇંગ્લિસની આ શાનદાર ઈનિંગે સ્ટેડિયમમાં હાજર પ્રેક્ષકોને મંત્રમુગ્ધ કરી દીધા હતા અને લખનૌ માટે જીતનો પાયો નાખ્યો હતો. ટૂર્નામેન્ટમાં યુવા ખેલાડીઓના આવા શાનદાર પ્રદર્શનથી આઈપીએલ 2026 વધુ રોમાંચક બની રહી છે.