હૈદરાબાદ:IPL 2026 માં રવિવારે રમાયેલી રોમાંચક મેચમાં કોલકાતા નાઈટ રાઈડર્સે સનરાઇઝર્સ હૈદરાબાદને તેના જ ઘરઆંગણે 8 વિકેટે પરાજય આપીને અગાઉની હારનો બદલો લીધો છે. 166 રનના લક્ષ્યાંકને KKR એ 18.2 ઓવરમાં માત્ર બે વિકેટ ગુમાવીને સરળતાથી હાંસલ કરી લીધો હતો. આ જીત સાથે કોલકાતાની પ્લેઓફમાં પહોંચવાની આશા હજુ પણ બરકરાર છે, જ્યારે હૈદરાબાદનો સતત પાંચ મેચનો વિજયી સિલસિલો થંભી ગયો છે.

રઘુવંશી અને રહાણેની મજબૂત બેટિંગ

લક્ષ્યાંકનો પીછો કરવા ઉતરેલી કોલકાતાની ટીમને કેપ્ટન અજિંક્ય રહાણે (43 રન) અને ફિન એલન (29 રન) એ 49 રનની મજબૂત શરૂઆત અપાવી હતી. એલન આઉટ થયા બાદ યુવા બેટ્સમેન અંગકૃષ રઘુવંશીએ બાજી સંભાળી હતી. રઘુવંશીએ 47 બોલમાં 59 રનની શાનદાર અડધી સદી ફટકારી હતી, જેમાં 5 ચોગ્ગા અને 2 છગ્ગા સામેલ હતા. રહાણે અને રઘુવંશી વચ્ચે બીજી વિકેટ માટે 84 રનની ભાગીદારી થઈ હતી. અંતમાં રિન્કુ સિંહે 11 બોલમાં અણનમ 22 રન બનાવીને ટીમને જીત અપાવી હતી.

ટ્રેવિસ હેડની ફિફ્ટી છતાં હૈદરાબાદનો ધબડકો

આ અગાઉ ટોસ જીતીને પ્રથમ બેટિંગ કરતા સનરાઇઝર્સ હૈદરાબાદની ટીમ 19 ઓવરમાં 165 રન બનાવી ઓલઆઉટ થઈ ગઈ હતી. ઓપનર ટ્રેવિસ હેડે માત્ર 28 બોલમાં 9 ચોગ્ગા અને 3 છગ્ગાની મદદથી 61 રનની તોફાની ઇનિંગ રમી હતી. ઇશાન કિશને પણ 42 રનનું યોગદાન આપ્યું હતું. જોકે, મધ્યક્રમમાં હેનરિક ક્લાસેન (11 રન) અને અન્ય બેટ્સમેનો નિષ્ફળ રહ્યા હતા. હૈદરાબાદે તેની છેલ્લી 8 વિકેટ માત્ર 60 રનમાં ગુમાવી દીધી હતી, જેના કારણે તેઓ મોટો સ્કોર બનાવવામાં નિષ્ફળ રહ્યા હતા.

વરુણ ચક્રવર્તીની સ્પિન જાળ

કોલકાતા તરફથી વરુણ ચક્રવર્તીએ શાનદાર બોલિંગ કરતા 3 વિકેટ ઝડપી હતી. સુનિલ નરેન અને કાર્તિક ત્યાગીએ 2-2 વિકેટ મેળવીને હૈદરાબાદની કમર તોડી નાખી હતી. આ જીત સાથે KKR ના 9 મેચમાં 7 પોઈન્ટ થયા છે. આ મેચમાં કેમેરૂન ગ્રીન અને વૈભવ અરોરાએ પણ એક-એક વિકેટ ઝડપીને જીતમાં મહત્વનું યોગદાન આપ્યું હતું. હૈદરાબાદ તરફથી પેટી કમિન્સ અને શિવાંગ કુમારને સફળતા મળી હતી પરંતુ તે જીત માટે પૂરતી નહોતી.