મુંબઈ: ઇન્ડિયન પ્રીમિયર લીગ (IPL) ૨૦૨૬ ની સીઝન હવે તેના અંતિમ ચરણમાં પહોંચી ગઈ છે, ત્યારે પ્લેઓફની રેસમાં ટકી રહેવા માટે રમાયેલા ૬૮મા મુકાબલામાં પંજાબ કિંગ્સે શાનદાર પ્રદર્શન કરીને લખનઉ સુપર જાયન્ટ્સને ૭ વિકેટે પરાજય આપ્યો છે. કરો કે મરો સમાન આ અત્યંત રોમાંચક મેચમાં જીત મેળવીને પંજાબ કિંગ્સે પ્લેઓફમાં ક્વોલિફાય કરવાની પોતાની આશાઓને મજબૂત રીતે જીવંત રાખી છે. લખનઉ સુપર જાયન્ટ્સે પ્રથમ બેટિંગ કરતા પંજાબ સમક્ષ જીતવા માટે ૧૯૭ રનનો મોટો સ્કોર ખડક્યો હતો, જેને પંજાબની ટીમે કેપ્ટન શ્રેયસ અય્યરની આક્રમક સદી અને પ્રભસિમરન સિંહની શાનદાર અડધી સદીની મદદથી માત્ર ૧૮ ઓવરમાં જ ૩ વિકેટ ગુમાવીને ૨૦૦ રન બનાવી આસાનીથી હાંસલ કરી લીધો હતો.

આ મેચમાં ટોસ જીતીને પ્રથમ બેટિંગ કરવા ઉતરેલી લખનઉ સુપર જાયન્ટ્સની ટીમે નિયત ૨૦ ઓવરમાં ૬ વિકેટના નુકસાને ૧૯૬ રનનો સન્માનજનક સ્કોર બનાવ્યો હતો. લખનઉ તરફથી જોશ ઇંગ્લિશ, નિકોલસ પૂરન અને કેપ્ટન ઋષભ પંતે ઉપયોગી ઇનિંગ્સ રમી હતી. પંજાબ કિંગ્સના બોલરોએ સમયાંતરે વિકેટો ઝડપીને રન ગતિ પર અંકુશ રાખવાનો પ્રયાસ કર્યો હતો, પરંતુ આખરી ઓવરોમાં અબ્દુલ સમદ અને આયુષ બદોનીની ફાસ્ટ બેટિંગના કારણે લખનઉ મજબૂત સ્થિતિમાં પહોંચ્યું હતું. લખનઉ માટે આ મેચ ગુમાવવા જેવું કંઈ નહોતું, પરંતુ આ હાર બાદ તેઓ પોઇન્ટ ટેબલમાં સૌથી નીચે એટલે કે ૧૦મા સ્થાને જ યથાવત રહ્યા છે. જો તેઓ જીત્યા હોત તો ૯મા સ્થાને આવી શક્યા હોત.

લક્ષ્યાંકનો પીછો કરવા ઉતરેલી પંજાબ કિંગ્સની શરૂઆત શાનદાર રહી હતી. ઓપનર પ્રભસિમરન સિંહે આક્રમક બેટિંગ કરીને અડધી સદી ફટકારી હતી અને પાવરપ્લેનો ભરપૂર ફાયદો ઉઠાવ્યો હતો. ત્યારબાદ ક્રીઝ પર આવેલા કેપ્ટન શ્રેયસ અય્યરે મેચની બાગડોર પોતાના હાથમાં લીધી હતી અને મેદાનની ચારેય તરફ ચોગ્ગા-છગ્ગાનો વરસાદ કરીને આઈપીએલ ૨૦૨૬ ની એક યાદગાર સેન્ચુરી ઠોકી હતી. શ્રેયસ અય્યરની આ સદીની મદદથી પંજાબે માત્ર ૧૮ ઓવરમાં જ ૩ વિકેટે ૨૦૦ રન બનાવીને મેગા વિજય મેળવ્યો હતો. આ જીત સાથે પંજાબ કિંગ્સના હવે ૧૫ પોઇન્ટ થઈ ગયા છે અને જો આગામી મેચમાં રાજસ્થાન રોયલ્સની ટીમ હારી જશે તો પંજાબ પ્લેઓફમાં સત્તાવાર રીતે ક્વોલિફાય થઈ જશે.

બંને ટીમો વચ્ચેના હેડ-ટુ-હેડ રેકોર્ડની વાત કરીએ તો આઈપીએલના ઈતિહાસમાં પંજાબ કિંગ્સ અને લખનઉ સુપર જાયન્ટ્સ વચ્ચે અત્યાર સુધીમાં કુલ ૭ મેચ રમાઈ છે, જેમાં પંજાબનો હાથ ઉપર રહ્યો છે. પંજાબે આ સાથે ૪ મેચમાં જીત મેળવી છે, જ્યારે લખનઉને ૩ મેચમાં સફળતા મળી છે. ખાસ કરીને ઇકાના સ્ટેડિયમમાં પંજાબ કિંગ્સે લખનઉને બે વાર પરાજય આપ્યો છે, જ્યારે લખનઉ આ મેદાન પર પંજાબ સામે માત્ર એક જ વાર જીતી શક્યું છે.

આ મહત્વપૂર્ણ મેચ માટે બંને ટીમોની પ્લેઇંગ ઇલેવન પર નજર કરીએ તો, લખનઉ સુપર જાયન્ટ્સની ટીમમાં જોશ ઇંગ્લિસ, અર્શિન કુલકર્ણી, નિકોલસ પૂરન, આયુષ બદોની, ઋષભ પંત (વિકેટકીપર/કેપ્ટન), અબ્દુલ સમદ, મુકુલ ચૌધરી, અર્જુન તેંડુલકર, મોહમ્મદ શમી, પ્રિન્સ યાદવ અને મોહસિન ખાનનો સમાવેશ થયો હતો. જ્યારે વિજેતા પંજાબ કિંગ્સની ટીમમાં પ્રભસિમરન સિંહ (વિકેટકીપર), પ્રિયાંશ આર્ય, કૂપર કોનોલી, શ્રેયસ અય્યર (કેપ્ટન), સૂર્યાંશ શેડગે, શશાંક સિંહ, અઝમતુલ્લા ઉમરઝઈ, માર્કો જાનસેન, વિજયકુમાર વૈશાક, અર્શદીપ સિંહ અને યુઝવેન્દ્ર ચહલ મેદાનમાં ઉતર્યા હતા.