હૈદરાબાદ: આઈપીએલ ૨૦૨૬ના ૨૭મા મુકાબલામાં સનરાઈઝર્સ હૈદરાબાદે શનિવારે ચેન્નાઈ સુપર કિંગ્સને ૧૦ રને પરાજય આપીને સીઝનની ત્રીજી જીત મેળવી છે. બીજી તરફ ઋતુરાજ ગાયકવાડની આગેવાની હેઠળની ચેન્નાઈ સુપર કિંગ્સની ટીમ માટે આ સીઝનની ચોથી હાર સાબિત થઈ છે. હૈદરાબાદે આપેલા ૧૯૫ રનના લક્ષ્યનો પીછો કરવા ઉતરેલી ચેન્નાઈની ટીમ ૨૦ ઓવરમાં ૮ વિકેટ ગુમાવીને ૧૮૪ રન જ બનાવી શકી હતી.
અભિષેક શર્માનું તોફાન અને મુકેશ ચૌધરીનો ઝટકો:
ચેન્નાઈના કેપ્ટન ઋતુરાજ ગાયકવાડે ટોસ જીતીને પહેલા બોલિંગ કરવાનો નિર્ણય લીધો હતો. હૈદરાબાદના સલામી બેટ્સમેન અભિષેક શર્માએ ૨૨ બોલમાં ૫૯ રન ફટકારીને આક્રમક શરૂઆત કરી હતી. તેણે માત્ર ૧૫ બોલમાં પોતાની અડધી સદી પુરી કરીને ગાયકવાડના નિર્ણયને ખોટો સાબિત કરવાનો પ્રયાસ કર્યો હતો. હૈદરાબાદનો સ્કોર ૫.૪ ઓવરમાં કોઈ પણ નુકસાન વિના ૭૫ રન હતો, પરંતુ પાવરપ્લેની છેલ્લી બે બોલ પર મુકેશ ચૌધરીએ ટ્રેવિસ હેડ (૨૩ રન) અને કેપ્ટન ઈશાન કિશન (૦) ને આઉટ કરીને હૈદરાબાદને બેવડો ઝટકો આપ્યો હતો.
મધ્યક્રમની નબળાઈ અને ક્લાસેનની લડત:
પાવરપ્લે બાદ હૈદરાબાદના બેટ્સમેનો માટે રન બનાવવા મુશ્કેલ બન્યા હતા. હેનરિક ક્લાસેને ૩૯ બોલમાં ૫૯ રન બનાવીને ટીમને ૨૦૦ રનની નજીક પહોંચાડવામાં મહત્વની ભૂમિકા ભજવી હતી. જોકે, નીતિશ રેડ્ડી (૧૨ રન), અનિકેટ વર્મા અને સલિલ અરોરા રનની ગતિ વધારવામાં નિષ્ફળ રહ્યા હતા. સનરાઈઝર્સની ટીમ ૯ વિકેટે ૧૯૪ રન બનાવી શકી હતી. ચેન્નાઈ તરફથી જેમી ઓવરટન અને અંશુલ કંબોજે ૩-૩ વિકેટ લઈને હૈદરાબાદની રનગતિ પર અંકુશ મેળવ્યો હતો. કંબોજે રાઉન્ડ ધ વિકેટથી સચોટ યોર્કર ફેંકીને ક્લાસેનને બોલ્ડ કર્યો હતો.
ચેન્નાઈની બેટિંગમાં મડાગાંઠ:
૧૯૫ રનના ટાર્ગેટ સામે ચેન્નાઈની શરૂઆત મધ્યમ રહી હતી. હૈદરાબાદના બોલરોએ શિસ્તબદ્ધ બોલિંગ કરીને ચેન્નાઈના બેટ્સમેનોને જકડી રાખ્યા હતા. મધ્ય ઓવરોમાં નૂર અહેમદે ભલે વિકેટ ન ઝડપી હોય, પણ રન રોકીને દબાણ વધાર્યું હતું. ગુરજપનીત સિંહે પણ ૧૨ ડોટ બોલ ફેંકીને ચેન્નાઈની મુશ્કેલીમાં વધારો કર્યો હતો. સંજુ સેમસનની સમયસૂચકતા અને રિવ્યુના સાચા નિર્ણયે પણ મેચનું પાસું પલટવામાં મોટી ભૂમિકા ભજવી હતી.
છેલ્લી ઓવરોમાં હૈદરાબાદનો દબદબો:
હૈદરાબાદે છેલ્લી ૫ ઓવરોમાં માત્ર ૪૦ રન આપ્યા હતા અને મહત્વની વિકેટો ઝડપી હતી. ચેન્નાઈ તરફથી અંતિમ ઓવરોમાં અપેક્ષિત આક્રમકતા જોવા મળી નહોતી. પરિણામે ચેન્નાઈ ૧૦ રન પાછળ રહી ગયું હતું. આ જીત સાથે હૈદરાબાદે પોઈન્ટ ટેબલમાં પોતાની સ્થિતિ સુધારી છે, જ્યારે ચેન્નાઈ માટે હવે પ્લેઓફની રેસમાં ટકી રહેવા માટે આગામી મેચોમાં વિજય મેળવવો અનિવાર્ય બન્યો છે.