નવી દિલ્‍હીઃ આઈપીએલના ચાહકોની આતુરતાનો અંત આવ્‍યો છે. આઈપીએલ-૨૦૨૭ના ખેલાડીઓના મિની ઓક્‍શનને લઈને ભારતીય ક્રિકેટ કંટ્રોલ બોર્ડએ મોટું અપડેટ આપ્‍યું છે. બીસીસીઆઈ સચિવ દેવજીત સૈકિયાએ જાહેરાત કરી છે કે આ વખતે આઈપીએલ ઓક્‍શન ડિસેમ્‍બરમાં ગોવામાં યોજાશે. આ સાથે ત્રણ વર્ષ બાદ આઈપીએલ ઓક્‍શન ફરી ભારતની ધરતી પર પરત ફરશે.

છેલ્‍લા ત્રણ વર્ષમાં ઓક્‍શન વિદેશમાં યોજાયું હતું. ૨૦૨૪માં દુબઈ, ૨૦૨૫ના મેગા ઓક્‍શનમાં જેદ્દાહ અને ૨૦૨૬માં અબુધાબી યજમાન બન્‍યા હતા. હવે ૨૦૨૭ની સિઝન માટેની ખેલાડીઓની પસંદગી પ્રક્રિયા ગોવામાં યોજાશે.

આ ઓક્‍શન મિની ઓક્‍શન હશે અને હાલના ૨૦૨૩-૨૭ ચક્રનું અંતિમ ખેલાડી ઓક્‍શન રહેશે. આઈપીએલ ચેરમેન અરુણ ધૂમલે જણાવ્‍યું છે કે ઓક્‍શન ડિસેમ્‍બરના મધ્‍યમાં, સંભવતઃ ૧૫થી ૧૬ ડિસેમ્‍બર દરમિયાન યોજાઈ શકે છે. જોકે ચોક્કસ તારીખ હજુ જાહેર કરવામાં આવી નથી.

ગોવા નક્કી થતાં હવે તમામ ફ્રેન્‍ચાઈઝીની નજર ખેલાડીઓના રિટેન્‍શન, રિલીઝ અને ટ્રેડ પર રહેશે. મિની ઓક્‍શન હોવાથી ટીમો પોતાની હાલની ટીમમાં રહેલી ચોક્કસ ખામીઓ દૂર કરવા અને જરૂરી ખેલાડીઓ ઉમેરવા માટે વ્‍યૂહરચના બનાવશે. આઈપીએલ-૨૦૨૭ની ટીમોનું અંતિમ ચિત્ર ઓક્‍શન બાદ વધુ સ્‍પષ્ટ થશે