સિએટલ (યુએસએ) : અમેરિકાના સિએટલ શહેરમાં રમાઈ રહેલા ફિફા (FIFA) વર્લ્ડ કપ ૨૦૨૬ના પિચ પરથી રમતની સાથે સાથે વૈશ્વિક સામાજિક મુત્સદ્દીગીરીના મોટા સમાચાર સામે આવ્યા છે. ઇજિપ્ત સામેની મેચ ૧-૧થી ડ્રો થયા બાદ પ્રેસ કોન્ફરન્સમાં ઈરાન ફૂટબોલ ટીમના કેપ્ટન મેહદી તારેમીને "પ્રાઇડ મેચ" (LGBTQ+ સમુદાયના સમર્થનમાં રમાતી મેચ) અંગે પ્રશ્નો પૂછવામાં આવ્યા હતા. તારેમીએ આ મુદ્દે ખૂબ જ સંતુલિત પરંતુ મક્કમ પ્રતિક્રિયા આપતા ઇસ્લામિક દેશની ધાર્મિક માન્યતાઓ અને માનવ અધિકારો વચ્ચેનો તફાવત સ્પષ્ટ કર્યો હતો.

સિએટલમાં રમાયેલી આ મેચને સ્થાનિક આયોજકો દ્વારા 'પ્રાઇડ ગેમ' તરીકે પ્રમોટ કરવામાં આવી હતી, જેના કારણે સ્ટેડિયમના વિવિધ સ્ટેન્ડ્સમાં મેઘધનુષ્ય (રેઈન્બો) ધ્વજ લહેરાતા જોવા મળ્યા હતા. ઈરાન સરકારે આ ધ્વજ પર પ્રતિબંધ મૂકવા ફિફાને વિનંતી કરી હતી, જેને ફિફાએ ફગાવી દીધી હતી.

"અમે અહીં માત્ર ફૂટબોલ રમવા આવ્યા છીએ"

મેચ બાદ પત્રકારો સાથે વાત કરતા કેપ્ટન મેહદી તારેમીએ સ્પષ્ટ કર્યું કે મેદાનની બહારની પ્રવૃત્તિઓથી તેમની ટીમના પ્રદર્શન કે અભિગમ પર કોઈ અસર પડી નથી. ઈરાનની સત્તાવાર ફાર્સ ન્યૂઝ એજન્સી દ્વારા જાહેર કરાયેલા નિવેદન અનુસાર તારેમીએ જણાવ્યું હતું કે, "અમારો ધર્મ (ઇસ્લામ) સમલૈંગિકતાને સ્વીકારતો નથી, તે એક વાસ્તવિકતા છે. પરંતુ માનવતાના નાતે અમે બધા જ LGBT લોકોનું સન્માન કરીએ છીએ. આ કોઈ અમારા વ્યક્તિગત એજન્ડા વિશે નથી. અમે અહીં માત્ર ફૂટબોલ રમવા આવ્યા છીએ અને અમારું ધ્યાન રમત પર જ કેન્દ્રિત છે."

રોમાંચક ડ્રો બાદ ઈરાનની નોકઆઉટ આશા જીવંત

આગામી ક્વોલિફિકેશન સમીકરણો

ભલે ઈરાનની ટીમ (ટીમ મેલી) ગ્રુપ-G સ્ટેજમાં એક પણ મેચ જીતી શકી નથી, પરંતુ તેની ત્રણેય મેચો ડ્રો થવાને કારણે તેમની રાઉન્ડ ઓફ ૩૨ (નોકઆઉટ) માં પહોંચવાની આશાઓ હજી પણ જીવંત છે. આ ગ્રુપમાંથી બેલ્જિયમ અને ઇજિપ્ત સીધા ક્વોલિફાય થઈ ચૂક્યા છે. હવે ઈરાનનું ભાગ્ય અન્ય ગ્રુપના પરિણામો પર ટકેલું છે. જો અલ્જેરિયા વિરુદ્ધ ઓસ્ટ્રિયા મેચમાં કોઈ વિજેતા બને, ઘાના ક્રોએશિયાને હરાવે અથવા ડીઆર કોંગો સામે ઉઝબેકિસ્તાનની હાર થાય - આ ત્રણમાંથી કોઈ પણ એક પરિણામ ઈરાનની તરફેણમાં જશે તો તેઓ આગળના રાઉન્ડમાં પ્રવેશ કરશે.

"ઈરાનના લોકો માટે અમારો જીવ પણ હાજર છે" – રમીન રેઝૈય્યાન

ઇજિપ્ત સામેની આ નાટકીય મેચ બાદ ઈરાનના સ્ટાર ખેલાડી રમીન રેઝૈય્યાને ફારસી ભાષામાં પોતાના દેશવાસીઓ માટે એક અત્યંત ભાવુક સંદેશ શેર કર્યો હતો. તેણે આંસુ ભરેલી આંખો સાથે કહ્યું, "મને સમજાતું નથી કે અમારું નસીબ આટલું ખરાબ કેમ છે કે વારંવાર જીત હાથમાંથી સરકી જાય છે. અમારા દેશના લોકો ઘણું સહન કરી રહ્યા છે અને તેઓ ખુશીઓ મેળવવાને લાયક છે."

તેણે વધુમાં ઉમેર્યું, "અમે છેલ્લા કેટલાય મહિનાઓથી કોઈ પણ સ્વાર્થ વગર માત્ર અમારા લોકોના પ્રેમ માટે લોહી-પરસેવો વહાવી રહ્યા છીએ. જો આજે મેદાન પર રમતા રમતા અમારું મોત પણ થઈ ગયું હોત, તો અમને કોઈ અફસોસ ન હોત. અમે બસ ઈરાનની જનતાના ચહેરા પર સ્મિત જોવા માંગીએ છીએ. જો અમારાથી કોઈ ભૂલ થઈ હોય તો હું હાથ જોડીને માફી માંગુ છું." ઈરાની ખેલાડીઓની આ ભાવનાત્મક રજૂઆત અત્યારે સોશિયલ મીડિયા પર ભારે વાયરલ થઈ રહી છે.