બેલફાસ્ટ:આંતરરાષ્ટ્રીય ક્રિકેટ જગતમાં શુક્રવારે એક બહુ મોટો અને ચોંકાવનારો ઉલટફેર જોવા મળ્યો છે. બેલફાસ્ટ ખાતે રમાયેલી પ્રથમ ટી૨૦ મેચમાં આયર્લેન્ડે અદભુત પ્રદર્શન કરીને વિશ્વ ચેમ્પિયન ભારતીય ક્રિકેટ ટીમને ૩૪ રનથી હરાવી દીધી છે. ક્રિકેટના ઇતિહાસમાં આયર્લેન્ડની ટીમ કોઈપણ ફોર્મેટમાં ભારતને પ્રથમ વખત હરાવવામાં સફળ રહી છે. આ મેચમાં આયર્લેન્ડે પ્રથમ બેટિંગ કરતા ૨૦ ઓવરમાં ૯ વિકેટ ગુમાવીને ૧૮૨ રનનો મજબૂત સ્કોર બનાવ્યો હતો. જેના જવાબમાં ભારતીય ટીમ ૧૮.૫ ઓવરમાં માત્ર ૧૪૮ રન કરીને ઓલઆઉટ થઈ ગઈ હતી.

**ટોસના સમયમાં મહિલા વર્લ્ડ કપના કારણે કરાયો ફેરફાર:**
આ મુકાબલામાં ભારતીય ટીમના કપ્તાન શ્રેયસ અય્યરે ટોસ જીતીને પ્રથમ બોલિંગ કરવાનો નિર્ણય કર્યો હતો. જોકે, આ મેચના સમયમાં મોટો ફેરફાર કરવામાં આવ્યો હતો. રવિવારે (૨૮ જૂન) લોર્ડ્સના મેદાન પર હરમનપ્રીત કૌરની આગેવાની હેઠળ ભારતીય મહિલા ટીમ અને ઓસ્ટ્રેલિયા વચ્ચે રમાનારી મહિલા વર્લ્ડ કપની મહત્વની મેચને ધ્યાનમાં રાખીને આ પુરુષ ટી૨૦ મેચ એક કલાક વહેલી શરૂ કરવામાં આવી હતી. કપ્તાન શ્રેયસ અય્યરે ટોસ સમયે માહિતી આપી હતી કે આ મેચમાં યુવા ખેલાડી વૈભવ સૂર્યવંશીને પ્લેઇંગ ઇલેવનમાં તક મળી શકી ન હતી.

**આયર્લેન્ડના કપ્તાન લોર્કન ટકરની શાનદાર અડધી સદી:**
પ્રથમ બેટિંગ કરવા ઉતરેલી આયર્લેન્ડની શરૂઆત ખૂબ જ ખરાબ રહી હતી. ટીમની બીજી જ ઓવરમાં ઓપનર રોસ અડાયર ૭ બોલમાં ૧૨ રન બનાવી આઉટ થયો હતો. ત્યારબાદ અર્શદીપ સિંહે હેરી ટેક્ટરને શૂન્ય રને પેવેલિયન ભેગો કર્યો હતો. હર્ષિત રાણાએ ઓપનર ટિમ ટેક્ટરને ૧૭ રને આઉટ કર્યો હતો અને શિવમ દુબેએ બેન્જામિન કેલિટ્ઝને ૧૫ રને આઉટ કર્યો હતો. જોકે, ત્યારબાદ આયર્લેન્ડના કપ્તાન લોર્કન ટકરે ૩૬ બોલમાં ૫૦ રનની શાનદાર ઇનિંગ રમી હતી, જ્યારે ગેરેથ ડેલાનીએ પણ ૪૯ રનની તોફાની ઇનિંગ રમી ટીમને ૧૮૨ ના સન્માનજનક સ્કોર સુધી પહોંચાડી હતી. ભારત તરફથી હર્ષિત રાણા સૌથી સફળ બોલર રહ્યો હતો, જેણે ૪ ઓવરમાં ૨૪ રન આપીને ૩ વિકેટ લીધી હતી. જ્યારે અર્શદીપ સિંહ અને અક્ષર પટેલે બે-બે વિકેટ લીધી હતી. પ્રસીધ્ધ ક્રિષ્ના ખુબ જ મોંઘા સાબિત થયા હતા, તેમણે એક પણ વિકેટ લીધા વિના ૫૭ રન લૂંટાવ્યા હતા.

**ભારતીય બેટિંગ લાઇન-અપ પત્તાના મહેલની જેમ વિખેરાઈ:**
૧૮૩ રનના લક્ષ્યાંકનો પીછો કરવા ઉતરેલી ભારતીય ટીમની શરૂઆત અત્યંત નિરાશાજનક રહી હતી. બીજી જ ઓવરમાં સંજુ સેમસન ૫ રન બનાવી આઉટ થયો હતો. ત્યારબાદ ઇશાન કિશન ૧ રન અને કપ્તાન શ્રેયસ અય્યર માત્ર ૩ રન બનાવી આઉટ થતાં ભારતે વહેલી વિકેટો ગુમાવી દીધી હતી. ઓપનર અભિષેક શર્માએ ૨૦ બોલમાં ૫૦ રનની આક્રમક અડધી સદી ફટકારીને લડત આપી હતી પરંતુ તે આઉટ થતાં જ ટીમ સંકટમાં મુકાઈ ગઈ હતી. તિલક વર્મા ૧૯ રન, વોશિંગ્ટન સુંદર ૯ રન, શિવમ દુબે ૨૫ રન અને અક્ષર પટેલ ૧૫ રન બનાવી આઉટ થયા હતા. હર્ષિત રાણા ૮ રન અને અર્શદીપ સિંહ ૨ રન બનાવી આઉટ થતાં પૂરી ટીમ ૧૪૮ રનમાં સમેટાઈ ગઈ હતી. આયર્લેન્ડ તરફથી મેટ હોલાર્ડ અને મેથ્યુ હમ્ફ્રીઝે ઘાતક બોલિંગ કરતા ૩-૩ વિકેટ ઝડપીને ભારતની હાર નક્કી કરી હતી.

**બંને દેશોની અંતિમ પ્લેઇંગ ઇલેવન આ મુજબ હતી:**
 * **ટીમ ઇન્ડિયા:** અભિષેક શર્મા, સંજુ સેમસન (વિકેટકીપર), ઇશાન કિશન, શ્રેયસ અય્યર (કપ્તાન), તિલક વર્મા, શિવમ દુબે, અક્ષર પટેલ, વોશિંગ્ટન સુંદર, હર્ષિત રાણા, અર્શદીપ સિંહ, પ્રસીધ્ધ ક્રિષ્ના.
 * **આયર્લેન્ડ:** ટિમ ટેક્ટર, રોસ અડાયર, હેરી ટેક્ટર, લોર્કન ટકર (વિકેટકીપર/કપ્તાન), બેન્જામિન કેલિટ્ઝ, ગેરેથ ડેલાની, જોર્જ ડોકરેલ, લિયામ મેકકાર્થી, મેથ્યુ હમ્ફ્રીઝ, જય મૂંદ્રા, મેથ્યુ હોલાર્ડ.