પાકિસ્તાનની મહિલા ક્રિકેટ ટીમ માટે મહિલા T20 એશિયા કપ 2026 મુશ્કેલીઓથી ભરેલો રહ્યો છે. ખરાબ પ્રદર્શન વચ્ચે હવે ટીમના ખેલાડીઓ ICCના નિયમોનું ઉલ્લંઘન કરીને પણ ચર્ચામાં આવી રહ્યા છે. અનુભવી બેટ્સમેન ગુલ ફિરોઝાને ICCએ સજા ફટકારી છે.

પાકિસ્તાને હોંગકોંગ સામે 72 રનથી જીત મેળવીને સેમિફાઇનલમાં સ્થાન મેળવ્યું હતું. જોકે, આ મેચમાં ગુલ ફિરોઝાનું બેટ ફરી નિષ્ફળ રહ્યું અને તે માત્ર 3 રન બનાવીને આઉટ થઈ ગઈ હતી.

LBW આઉટ આપ્યા બાદ ગુલ ફિરોઝા અમ્પાયરના નિર્ણયથી નારાજ થઈ હતી. તેણે પોતાના બેટ તરફ ઈશારો કરીને નિર્ણય સામે અસંમતિ વ્યક્ત કરી હતી, પરંતુ તેની આ હરકત ICCના નિયમો વિરુદ્ધ માનવામાં આવી.

ICCએ ગુલ ફિરોઝાને આચારસંહિતાની કલમ 2.8 હેઠળ દોષિત ઠેરવી હતી. અમ્પાયરના નિર્ણય સામે અસંમતિ દર્શાવવાને નિયમોનું ઉલ્લંઘન ગણાવીને તેની મેચ ફીના 10 ટકા દંડ ફટકારવામાં આવ્યો હતો.

આ ઉપરાંત ગુલ ફિરોઝાના ખાતામાં એક ડિમેરિટ પોઈન્ટ પણ ઉમેરાયો છે. મહિલા એશિયા કપમાં સજા મેળવનારી તે સતત બીજી પાકિસ્તાની ખેલાડી બની છે. અગાઉ ભારત સામેની મેચમાં કેપ્ટન ફાતિમા સનાને પણ ICCએ દંડ ફટકાર્યો હતો