નવી દિલ્હી: મુંબઈ ઈન્ડિયન્સ (MI) ના ભૂતપૂર્વ ફિલ્ડિંગ કોચ જેમ્સ પેમેન્ટે જણાવ્યું હતું કે તેઓ માહેલા જયવર્ધનેના ફ્રેન્ચાઇઝના મુખ્ય કોચ પદ પરથી રાજીનામું આપવાથી થોડા આશ્ચર્યચકિત થયા છે. તેમણે આ ભૂમિકા માટે કિરોન પોલાર્ડને ટેકો આપ્યો છે. જયવર્ધને ગયા અઠવાડિયે MI ના મુખ્ય કોચ તરીકે રાજીનામું આપ્યું હતું, જેનાથી પાંચ વખતના ઇન્ડિયન પ્રીમિયર લીગ (IPL) ચેમ્પિયન સાથે તેમનો બીજો કાર્યકાળ સમાપ્ત થયો. 2017 થી 2022 સુધીના તેમના પ્રથમ કાર્યકાળ દરમિયાન, તેમણે ટીમને ત્રણ ટાઇટલ અપાવ્યા. MI માં આઠ વર્ષ સુધી જયવર્ધને સાથે કામ કરનારા પેમેન્ટે કહ્યું કે તેઓ આ પરિવર્તનની અપેક્ષા રાખતા ન હતા ખાસ વાત કરતા તેમણે કહ્યું, "જ્યારે મેં સપ્તાહના અંતે જોયું કે માહેલાએ રાજીનામું આપવાનો નિર્ણય લીધો છે, ત્યારે તે થોડું આઘાતજનક હતું. મેં માહેલા સાથે ઘણા વર્ષો કામ કર્યું, અને મને તે ખૂબ ગમ્યું." "તે મુંબઈ ઈન્ડિયન્સ અને ટીમના પ્રદર્શન પ્રત્યે ખૂબ જ ઉત્સાહી હતો. તેને ખેલાડીઓ, ખાસ કરીને ભારતીય ખેલાડીઓને વિકસાવવામાં ખૂબ જ રસ હતો, જેથી તેઓ ભવિષ્યમાં ભારત માટે મુખ્ય ખેલાડી બની શકે. ન્યુઝીલેન્ડના આ પ્રવાસ પર આવેલા ઘણા ખેલાડીઓ હવે પણ આવું જ કરી રહ્યા છે. તેથી જ મને આશ્ચર્ય થયું. હવે, મને ટીમની આંતરિક બાબતોની સંપૂર્ણ જાણકારી નથી, તેથી મને ખબર નથી કે શું ચાલી રહ્યું છે - ચાલો જોઈએ શું થાય છે."તે માને છે કે આક્રમક બેટ્સમેન કિરોન પોલાર્ડ આ પદ માટે સૌથી મજબૂત દાવેદારોમાંનો એક છે. પોલાર્ડે મુંબઈ ઈન્ડિયન્સ સાથે તેની આઈપીએલ કારકિર્દીની શરૂઆત કરી હતી અને ખેલાડી તરીકે સફળ કાર્યકાળ પછી, તે જ ફ્રેન્ચાઇઝી સાથે બેટિંગ કોચ તરીકે તેની કોચિંગ કારકિર્દીની શરૂઆત કરી હતી. તેથી, તેને આ ભૂમિકા માટે યોગ્ય માનવામાં આવે છે.પેમેન્ટે કહ્યું"સાચું કહું તો, મને નથી લાગતું કે કિરોન પોલાર્ડ સિવાય બીજું કોઈ આ જવાબદારી સંભાળી શકે. ઘણા નામોની ચર્ચા થઈ રહી છે, પરંતુ મારા મતે, જો કિરોનને લાગે છે કે તે તેના માટે તૈયાર છે, તો હું તેને આ જવાબદારી આપીશ. મેં (માઇક) હસી અને કેટલાક અન્ય લોકો વિશે સાંભળ્યું છે, પરંતુ એક વ્યક્તિ એવી છે જે સંપૂર્ણપણે મુંબઈ ઇન્ડિયન્સના રંગમાં છે," .