મુંબઈ : કોલકાતા નાઈટ રાઈડર્સ એટલે કે કેકેઆરની સહ-માલિક જૂહી ચાવલાએ ભૂતપૂર્વ આઈપીએલ ચેરમેન લલિત મોદીના પ્રસ્તાવને ટેકો જાહેર કર્યો છે. તેમણે જણાવ્યું છે કે વિશ્વની સૌથી મોટી ટી૨૦ લીગને એપ્રિલ-મે ની ગરમીના સમયને બદલે જાન્યુઆરી મહિનામાં યોજવી જોઈએ.

લલિત મોદીની સોશિયલ મીડિયા પોસ્ટ પર પ્રતિક્રિયા આપતા જૂહી ચાવલાએ જણાવ્યું કે આઈપીએલ હવે એક વૈશ્વિક અને વ્યાપારી પ્રોપર્ટી બની ચૂક્યું છે. તેમણે દાવો કર્યો કે આ ટુર્નામેન્ટે આંતરરાષ્ટ્રીય ક્રિકેટ કેલેન્ડરને પ્રભાવિત કરવાનો અધિકાર મેળવી લીધો છે અને હવે તેણે કોઈ ચોક્કસ સમયમર્યાદા પર નિર્ભર રહેવાની જરૂર નથી.

તેમણે સવાલ ઉઠાવ્યો કે આખી દુનિયાની સૌથી મોટી ક્રિકેટ ટુર્નામેન્ટને આકરી ગરમીમાં શા માટે રમવી જોઈએ. જો બોર્ડ દ્વારા સમયપત્રક પર પુનર્વિચાર કરવામાં આવી રહ્યો છે, તો એપ્રિલ-મે ને બદલે જાન્યુઆરીનો વિકલ્પ કેમ ન પસંદ કરવો જોઈએ.

જૂહી ચાવલાએ આ સંભવિત ફેરફારના ફાયદા ગણાવતા કહ્યું કે આનાથી ખેલાડીઓને રમવા માટે વધુ સારી સ્થિતિ મળશે અને તમામ સંબંધિત લોકો માટે અનુભવ વધુ સારો બનશે. આઈપીએલ હવે ઘણું વિકસિત થઈ ચૂક્યું છે અને હવે તેના કેલેન્ડરમાં પણ બદલાવ આવવો જોઈએ.

અગાઉ લલિત મોદીએ ભારતીય ક્રિકેટ કંટ્રોલ બોર્ડ એટલે કે બીસીસીઆઈને વિનંતી કરી હતી કે તે વર્તમાન એપ્રિલ-મે ની વિન્ડોમાંથી ટુર્નામેન્ટને બહાર લાવવા અંગે ગંભીરતાથી વિચારે. તેમણે જાન્યુઆરી અથવા ઓક્ટોબરથી એપ્રિલ સુધીના સમયગાળાના વિકલ્પો રજૂ કર્યા હતા.