નવી દિલ્હી: IPL 2026 માં આજે દિલ્હીના અરુણ જેટલી સ્ટેડિયમ ખાતે રમાયેલી પંજાબ કિંગ્સ અને દિલ્હી કેપિટલ્સ વચ્ચેની મેચમાં ક્રિકેટ પ્રેમીઓને રનનું વાવાઝોડું જોવા મળ્યું હતું. દિલ્હીના કેપ્ટન કેએલ રાહુલે આજે પંજાબના બોલરોની એવી ધુલાઈ કરી કે આખું સ્ટેડિયમ સ્તબ્ધ થઈ ગયું હતું. રાહુલે તેની આઈપીએલ કરિયરની છઠ્ઠી સદી ફટકારવાની સાથે એવો રેકોર્ડ બનાવ્યો છે જે આજ સુધી કોઈ ભારતીય બેટ્સમેન કરી શક્યો નથી.
ટોસ જીતીને પ્રથમ બેટિંગ કરવા ઉતરેલી દિલ્હીની ટીમ માટે કેએલ રાહુલ અને નીતિશ રાણાએ પાયો નાખ્યો હતો. રાહુલે માત્ર 67 બોલમાં અણનમ 152 રનની ઈનિંગ રમી હતી, જેમાં 16 ચોગ્ગા અને 9 ગગનચુંબી છગ્ગાનો સમાવેશ થાય છે. આ સાથે જ કેએલ રાહુલ IPL ના ઈતિહાસમાં 150 થી વધુ રન બનાવનાર પ્રથમ ભારતીય ખેલાડી બની ગયો છે. આ પહેલા ભારતીય ખેલાડી તરીકે અભિષેક શર્માના નામે 141 રનનો રેકોર્ડ હતો, જે આજે રાહુલે ધ્વસ્ત કરી દીધો છે.
રેકોર્ડ્સની વણઝાર અને ઓરેન્જ કેપ પર કબજો:
કેએલ રાહુલની આ ઈનિંગે અનેક જૂના રેકોર્ડ્સના પાના ફાડી નાખ્યા છે:
•    વ્યક્તિગત સ્કોર: રાહુલે પોતાનો જ 132 રનનો સર્વાધિક સ્કોર તોડીને હવે 152 રનનો નવો માઈલસ્ટોન સેટ કર્યો છે.
•    ઓરેન્જ કેપ: આ વિસ્ફોટક ઈનિંગ સાથે રાહુલ 7 મેચમાં 357 રન બનાવીને ઓરેન્જ કેપની રેસમાં પ્રથમ સ્થાને પહોંચી ગયો છે, તેણે વિરાટ કોહલી (328 રન) ને બીજા સ્થાને ધકેલી દીધો છે.
•    ટીમ સ્કોર: રાહુલના તોફાનની મદદથી દિલ્હીએ 20 ઓવરમાં 2 વિકેટે 264 રનનો પહાડ જેવો સ્કોર ખડક્યો છે, જે આ સિઝનનો હાઈએસ્ટ ટીમ સ્કોર છે.
આઈપીએલના ઈતિહાસમાં અત્યાર સુધી માત્ર ક્રિસ ગેલ (175*) અને બ્રેન્ડન મેક્કુલમ જેવા વિદેશી ખેલાડીઓ જ 150 ના આંકડાને સ્પર્શી શક્યા હતા, પરંતુ આજે રાહુલે સાબિત કરી દીધું કે ભારતીય બેટ્સમેનો પણ 'પાવર હિટિંગ' માં પાછળ નથી. 157 મેચોમાં 5582 રન પૂરા કરનાર રાહુલ હવે રન મશીન બનીને ઉભરી રહ્યો છે. દિલ્હીના ચાહકો માટે આજની સાંજ ખરેખર યાદગાર બની ગઈ છે.