લંડન, તા. ૨૭: રમતગમતની દુનિયામાં જે વાત અશક્ય માનવામાં આવતી હતી, તે કેન્યાના ૩૧ વર્ષીય દોડવીર સબાસ્ટિયન સોવેએ કરી બતાવી છે. રવિવારે યોજાયેલી પ્રતિષ્ઠિત લંડન મેરેથોનમાં સોવેએ 'સબ-ટુ' (બે કલાકથી ઓછો સમય) નો આંકડો પાર કરીને ઇતિહાસના પાનામાં પોતાનું નામ સુવર્ણ અક્ષરે અંકિત કરી દીધું છે. સ્પર્ધાત્મક દોડમાં સત્તાવાર રીતે ૨ કલાકથી ઓછા સમયમાં મેરેથોન પૂર્ણ કરનાર તે વિશ્વનો પ્રથમ ખેલાડી બન્યો છે.
કેલ્વિન કિપ્ટમનો રેકોર્ડ ધરાશાયી
સબાસ્ટિયન સોવેએ આ મેરેથોન માત્ર ૧ કલાક ૫૯ મિનિટ ૩૦ સેકન્ડમાં પૂર્ણ કરી હતી. તેણે વર્ષ ૨૦૨૩માં દિવંગત કેલ્વિન કિપ્ટમ દ્વારા સ્થાપિત ૨ કલાક ૩૫ સેકન્ડના વર્લ્ડ રેકોર્ડને એક મિનિટથી પણ વધુ સમયના તફાવતથી તોડી નાખ્યો છે. રેસની શરૂઆતથી જ સોવે અત્યંત આક્રમક જણાતો હતો. તેણે અડધું અંતર (હાફ મેરેથોન) માત્ર ૧ કલાક ૨૯ સેકન્ડમાં કાપી લીધું હતું, જેણે સંકેત આપી દીધો હતો કે આજે લંડનની સડકો પર નવો ઇતિહાસ રચાશે.
અંતિમ ૧૦ કિલોમીટરમાં બતાવ્યો દમ
રેસના બીજા ભાગમાં સોવેએ પોતાની ગતિમાં અસાધારણ વધારો કર્યો હતો. દિગ્ગજ દોડવીર એલિયુડ કિપચોગેના સમય કરતા પણ વધુ ઝડપથી દોડીને તેણે અંતિમ ૧૦ કિલોમીટરમાં નિર્ણાયક લીડ મેળવી લીધી હતી. આ મેરેથોનમાં પદાર્પણ કરી રહેલા ઈથોપિયાના યોમિફ કેજેલ્ચાએ તેને આકરી ટક્કર આપી હતી. કેજેલ્ચાએ પણ ૧ કલાક ૫૯ મિનિટ ૪૯ સેકન્ડનો સમય કાઢીને ઇતિહાસ રચ્યો હતો. આમ, એક જ રેસમાં બે ખેલાડીઓએ 'સબ-ટુ' કલાકનો માઇલસ્ટોન પાર કરતા સમગ્ર રમત જગત સ્તબ્ધ થઈ ગયું છે.
લંડન મેરેથોન માટે સુવર્ણ દિવસ
લંડન મેરેથોનના આયોજકો અને પ્રેક્ષકો માટે આ દિવસ યાદગાર બની રહ્યો હતો. નિષ્ણાતોનું માનવું છે કે માનવ શરીર માટે ૨ કલાકથી ઓછા સમયમાં ૪૨.૧૯૫ કિમી દોડવું એ વિજ્ઞાનના મતે અતિ મુશ્કેલ હતું, પરંતુ સોવેએ સાબિત કરી દીધું કે દ્રઢ મનોબળ અને સખત મહેનતથી કોઈ પણ સીમા ઓળંગી શકાય છે.
આ ભવ્ય વિજય સાથે સબાસ્ટિયન સોવે હવે વિશ્વનો સૌથી ઝડપી મેરેથોન રનર બની ગયો છે. સોશિયલ મીડિયા પર ખેલ જગતની હસ્તીઓ તેને 'સુપરમેન' કહીને વધાવી રહી છે. લંડનની ગલીઓમાં હજારો લોકોએ આ ઐતિહાસિક ક્ષણના સાક્ષી બની સોવેનું ઉષ્માભર્યું સ્વાગત કર્યું હતું.