મુંબઈ, તા.૦૬: આગામી ૧૬ ડિસેમ્બરે ગોવામાં યોજાનારા ઇન્ડિયન પ્રીમિયર લીગ (IPL) ના મિની ઑક્શન અગાઉ ક્રિકેટ જગતમાં ખેલાડીઓની અદલાબદલી માટેની મેગા ટ્રેડ-ડીલની ચર્ચાઓએ જોર પકડ્યું છે, જેમાં ખાસ કરીને મુંબઈ ઇન્ડિયન્સ (MI) ના ભૂતપૂર્વ કૅપ્ટન હાર્દિક પંડ્યા અને સ્ટાર બેટ્સમેન સૂર્યકુમાર યાદવના ભવિષ્યને લઈને અનેક અટકળો વહેતી થઈ છે.

પ્રાપ્ત અહેવાલો મુજબ, હાર્દિક પંડ્યાને ટ્રેડ-ડીલ અંતર્ગત પંજાબ કિંગ્સને સોંપવાની ચર્ચાઓ હાલ નિર્ણાયક તબક્કામાં પહોંચી છે, જ્યારે બીજી તરફ મુંબઈ ઇન્ડિયન્સે સ્પષ્ટતા કરી દીધી છે કે ભારતની ટી-૨૦ ટીમના કૅપ્ટન સૂર્યકુમાર યાદવને ટ્રેડ કરવા અંગે કોઈ જ ચર્ચા થઈ રહી નથી અને 'સૂર્યા ઇઝ નૉટ ફૉર ટ્રેડ' એટલે કે સૂર્યકુમાર વેચાઉ કે અદલાબદલી માટે ઉપલબ્ધ નથી.

સૂર્યકુમાર યાદવ માટે ભલે ૨૦૨૬ની આઇપીએલ સીઝન અપેક્ષિત ન રહી હોય અને તેણે ૧૩ મૅચમાં માત્ર ૨૭૦ રન જ બનાવ્યા હોય, પરંતુ ૨૦૨૫ની સીઝનમાં ૧૬ મૅચમાં ૭૧૭ રન ફટકારનાર આ વિસ્ફોટક બેટ્સમેનને ટીમમાંથી છોડવાના મૂડમાં મુંબઈનું મેનેજમેન્ટ બિલકુલ નથી.

બીજી તરફ, હાર્દિક પંડ્યાને પંજાબ કિંગ્સમાં મોકલવાના બદલામાં અર્શદીપ સિંહ અથવા અન્ય કોઈ સ્ટાર પેસ બોલરને મેળવવા માટે વાતો ચાલી રહી છે, જોકે મુંબઈએ અગાઉ કોલકાતા નાઇટ રાઇડર્સ (KKR) ના યુવા ઝડપી બોલર હર્ષિત રાણામાં પણ રસ દાખવ્યો હતો પરંતુ KKR તેને રિલીઝ કરવા તૈયાર નથી.

ટ્રેન્ટ બૉલ્ટ અને દીપક ચાહરના ગત સિઝનના નિરાશાજનક પ્રદર્શન બાદ મુંબઈ ફ્રૅન્ચાઇઝી પોતાની બોલિંગ લાઇનઅપને વધુ મજબૂત કરવા માટે એક ઘાતક પેસ બોલરની સખત શોધ કરી રહી છે, જેથી આગામી ઑક્શન અગાઉની આ રણનીતિઓ ટૂર્નામેન્ટમાં મોટો બદલાવ લાવી શકે છે.
 

આ ઉપરાંત રોહિત શર્મા, રાયન રિકલ્ટન, તિલક વર્મા, વિલ જૅક્સ અને મિચલ સૅન્ટનર જેવા દિગ્ગજ અને ઉપયોગી ખેલાડીઓથી સજ્જ મુંબઈ ઇન્ડિયન્સની ટીમ આગામી સિઝન માટે પોતાની તૈયારીઓને આખરી ઓપ આપી રહી છે, ત્યારે રાજસ્થાન રૉયલ્સ સાથે પણ યશસ્વી જયસ્વાલ અને રવિ બિશ્નોઈને લઈને વાતો ચાલી રહી હોવાનું ચર્ચાઈ રહ્યું છે.