રાયપુર: આઈપીએલ ૨૦૨૬ ની ૫૪મી મેચમાં રોયલ ચેલેન્જર્સ બેંગ્લુરુએ મુંબઈ ઈન્ડિયન્સને હરાવીને ટૂર્નામેન્ટમાંથી બહાર કરી દીધું છે. રાયપુરના શહીદ વીર નારાયણ સિંહ ઈન્ટરનેશનલ સ્ટેડિયમમાં રમાયેલી આ 'કરો અથવા મરો' જેવી મેચમાં બેંગ્લુરુએ ૨ વિકેટે વિજય હાંસલ કર્યો હતો. મુંબઈ ઈન્ડિયન્સે પ્રથમ બેટિંગ કરતા ૧૬૬ રન બનાવ્યા હતા, જેના જવાબમાં બેંગ્લુરુએ ૮ વિકેટ ગુમાવીને અંતિમ ઓવરના છેલ્લા બોલે લક્ષ્યાંક પ્રાપ્ત કર્યો હતો. આ હાર સાથે જ પાંચ વખતની ચેમ્પિયન મુંબઈ ઈન્ડિયન્સની પ્લેઓફમાં પહોંચવાની તમામ આશાઓ પર પાણી ફરી વળ્યું છે અને તેઓ હવે સત્તાવાર રીતે ટૂર્નામેન્ટમાંથી બહાર ફેંકાઈ ગયા છે.

મુંબઈ ઈન્ડિયન્સની ઈનિંગની શરૂઆત અત્યંત નબળી રહી હતી. ઈજાગ્રસ્ત હાર્દિક પંડ્યાની ગેરહાજરીમાં ટીમનું નેતૃત્વ કરી રહેલા સૂર્યકુમાર યાદવ અને અનુભવી બેટર રોહિત શર્મા નિષ્ફળ રહ્યા હતા. ભુવનેશ્વર કુમારે પોતાની ધારદાર બોલિંગથી મુંબઈના ટોચના ક્રમને વેરવિખેર કરી દીધો હતો. રોહિત શર્મા ૨૨ રન અને સૂર્યકુમાર યાદવ શૂન્ય રને ભુવનેશ્વરનો શિકાર બન્યા હતા. ૨૮ રનમાં ૩ વિકેટ ગુમાવ્યા બાદ તિલક વર્મા અને નમન ધીરે બાજી સંભાળી હતી. બંને વચ્ચે ચોથી વિકેટ માટે ૮૨ રનની મહત્વની ભાગીદારી થઈ હતી. તિલક વર્માએ ૪૨ બોલમાં ૫૭ રન અને નમન ધીરે ૪૭ રન ફટકારી ટીમને ૧૬૬ રન સુધી પહોંચાડી હતી. બેંગ્લુરુ તરફથી ભુવનેશ્વર કુમારે ૪ ઓવરમાં ૨૩ રન આપી ૪ વિકેટ ઝડપી હતી.

૧૬૭ રનના લક્ષ્યાંકનો પીછો કરવા ઉતરેલી બેંગ્લુરુની ટીમની શરૂઆત પણ આંચકાજનક રહી હતી. સ્ટાર બેટર વિરાટ કોહલી શૂન્ય રને આઉટ થયા હતા અને ત્યારબાદ દેવદત્ત પડિક્કલ ૧૨ રન તેમજ કેપ્ટન રજત પાટીદાર ૮ રન બનાવી આઉટ થતા બેંગ્લુરુ મુશ્કેલીમાં મુકાયું હતું. જોકે, કૃણાલ પંડ્યાએ મેદાન સંભાળ્યું હતું અને જેકબ બેથલ સાથે મળીને ચોથી વિકેટ માટે ૫૫ રન જોડ્યા હતા. કૃણાલ પંડ્યાએ ૪૬ બોલમાં ૭૩ રનની ઝંઝાવાતી ઈનિંગ રમીને મેચનો પાસો પલટી નાખ્યો હતો. મધ્યક્રમમાં જેકબ બેથલે ૨૭ રન અને જીતેશ શર્માએ ૧૮ રનનું યોગદાન આપ્યું હતું. મુંબઈ તરફથી કોર્બિન બોશે તરખાટ મચાવતા ૪ વિકેટ લીધી હતી અને એક સમયે સતત બે બોલમાં વિકેટ લઈને બેંગ્લુરુને દબાણમાં લાવી દીધું હતું.

મેચનો અંતિમ તબક્કો અત્યંત નાટકીય રહ્યો હતો. છેલ્લી ઓવરમાં જીતવા માટે ૧૫ રનની જરૂર હતી અને મુંબઈ તરફથી રાજ બાવા બોલિંગ કરી રહ્યા હતા. મેદાન પર રહેલા ભુવનેશ્વર કુમારે સંયમપૂર્વક બેટિંગ કરી અને સિક્સર ફટકારી ટીમને જીતની નજીક પહોંચાડી હતી. ભુવનેશ્વર કુમારે અણનમ ૭ રન અને રસિખ સલામ દારે ૩ રન બનાવીને છેલ્લા બોલે ટીમને જીત અપાવી હતી. મુંબઈ ઈન્ડિયન્સ માટે આ સિઝન અત્યંત નિરાશાજનક રહી છે, જેમાં તેઓ ૧૦ મેચોમાંથી માત્ર ૩ જ જીત મેળવી શક્યા છે. બીજી તરફ બેંગ્લુરુની ટીમ ૧૨ પોઈન્ટ સાથે હવે પોઈન્ટ ટેબલમાં ચોથા ક્રમે પહોંચી ગઈ છે અને તેમની પ્લેઓફમાં પહોંચવાની આશા જીવંત રહી છે.