રાજકોટ : ઈન્ડિયન પ્રીમિયર લીગ (IPL) 2026 માં રોયલ ચેલેન્જર્સ બેંગલુરુ (RCB) ના પ્રદર્શન અને રજત પાટીદારની કેપ્ટનશીપે ક્રિકેટ જગતમાં ભારે ચર્ચા જગાવી છે. દક્ષિણ આફ્રિકાના પૂર્વ કેપ્ટન અને ક્રિકેટ વિવેચક શોન પોલોકે એક મોટું નિવેદન આપતા રજત પાટીદારને વિરાટ કોહલી કરતા પણ ચડિયાતો અને 'RCB નો અત્યાર સુધીનો સૌથી મહાન કેપ્ટન' ગણાવ્યો છે.
પાટીદાર: જે વિરાટ અને ફાફ ન કરી શક્યા તે કરી બતાવ્યું
શોન પોલોકે ક્રિકબઝ પર વાત કરતા જણાવ્યું હતું કે, રજત પાટીદાર RCB ના ઈતિહાસમાં સૌથી સફળ કેપ્ટન તરીકે યાદ રાખવામાં આવશે. તેનું કારણ એ છે કે તેણે કેપ્ટન તરીકેના પોતાના પ્રથમ જ વર્ષમાં ટીમને આઈપીએલનું મેઈડન ટાઈટલ (પ્રથમ ખિતાબ) અપાવ્યું હતું. વિરાટ કોહલીએ લાંબા સમય સુધી ટીમની કમાન સંભાળી અને ત્યારબાદ ફાફ ડુ પ્લેસિસે નેતૃત્વ કર્યું, પરંતુ ટ્રોફી જીતવાનું સપનું રજત પાટીદારની આગેવાનીમાં જ સાકાર થયું છે.
'હી ઈઝ ધ ગોટ' (GOAT): પોલોકની નજરે શ્રેષ્ઠ
પોલોકે વધુમાં ઉમેર્યું કે, "સીધી વાત છે, જે ફ્રેન્ચાઈઝી આટલા લાંબા સમયથી ટ્રોફી માટે તરસતી હતી તેને પહેલા જ વર્ષમાં ચેમ્પિયન બનાવવી એ નાની વાત નથી. આ વર્ષે પણ ટીમ જે રીતે રમી રહી છે તે જોતા તેઓ ફરીથી પ્લેઓફમાં ક્વોલિફાય થાય તે નિશ્ચિત જણાય છે. અત્યારના તબક્કે રજત પાટીદાર જ સાચો 'GOAT' (ગ્રેટેસ્ટ ઓફ ઓલ ટાઈમ) કેપ્ટન છે."
વિરાટની 18 વર્ષની રાહનો આવ્યો અંત
વિરાટ કોહલી વર્ષો સુધી RCB સાથે જોડાયેલો રહ્યો છે અને તેની કેપ્ટનશીપ હેઠળ ટીમ ફાઈનલ સુધી પહોંચી હતી, પણ ખિતાબ જીતી શકી નહોતી. ગયા વર્ષે ફાફ ડુ પ્લેસિસના સ્થાને જ્યારે રજત પાટીદારને કેપ્ટન બનાવવામાં આવ્યો, ત્યારે પરિણામો તરત જ જોવા મળ્યા. પાટીદારે માત્ર બેટિંગમાં જ નહીં પણ ફિલ્ડ પરની વ્યુહરચનામાં પણ પોતાની ક્ષમતા સાબિત કરી છે.
હાલમાં આઈપીએલ 2026 માં RCB જે ફોર્મમાં છે તે જોતા રજત પાટીદાર ફરી એકવાર ઈતિહાસ રચી શકે છે તેવી શક્યતાઓ વર્તાઈ રહી છે. ક્રિકેટ ફેન્સ પણ સોશિયલ મીડિયા પર પોલોકના આ નિવેદનને સમર્થન આપી રહ્યા છે.