મુંબઈ: આઈપીએલ 2026 (IPL 2026) માં મુંબઈના ઐતિહાસિક વાનખેડે સ્ટેડિયમ ખાતે રમાયેલી મુંબઈ ઈન્ડિયન્સ અને પંજાબ કિંગ્સ વચ્ચેની મેચમાં ફિલ્ડિંગનો એક એવો નમૂનો જોવા મળ્યો, જેણે ક્રિકેટ જગતના ભગવાન ગણાતા સચિન તેંડુલકરને પણ પ્રશંસા કરવા મજબૂર કરી દીધા છે. પંજાબ કિંગ્સના કેપ્ટન શ્રેયસ ઐયરે બાઉન્ડ્રી પર જે રીતે હાર્દિક પંડ્યાનો 'રિલે કેચ' પકડ્યો, તે આ સીઝનનો અત્યાર સુધીનો સૌથી શ્રેષ્ઠ કેચ માનવામાં આવી રહ્યો છે.
સચિન તેંડુલકર થયા પ્રભાવિત
ક્રિકેટના દિગ્ગજ સચિન તેંડુલકરે સોશિયલ મીડિયા પ્લેટફોર્મ 'X' પર શ્રેયસ ઐયરની મુક્ત કંઠે પ્રશંસા કરી હતી. સચિને સમજાવ્યું કે આ કેચ માત્ર એથ્લેટિકિઝમ (રમતવીરતા) નો જ નહીં, પરંતુ અદભૂત માનસિક જાગૃતિનો પણ પુરાવો છે. સચિને લખ્યું, "શ્રેયસ ઐયરના કેચને જે બાબત ખાસ બનાવે છે તે તેની જાગૃતિ (Awareness) હતી. તેણે હવામાં ઉછળતી વખતે બોલની ગતિ, ઊંચાઈ અને બાઉન્ડ્રી લાઇનનું ચોક્કસ મૂલ્યાંકન કર્યું હતું. હવામાં હોવા છતાં તેને ખબર હતી કે તેના સાથી ખેલાડી ઝેવિયર બાર્ટલેટ ક્યાં છે. આ બધું એક સેકન્ડના સોમા ભાગમાં નક્કી કરવા માટે અવિશ્વસનીય ફિટનેસ અને સંયમની જરૂર પડે છે."
મુંબઈ ડગઆઉટ અવિશ્વાસમાં
જ્યારે શ્રેયસ ઐયરે આ કેચ પૂર્ણ કર્યો, ત્યારે સ્ટેડિયમમાં હાજર મુંબઈ ઈન્ડિયન્સના ઉપ-કેપ્ટન સૂર્યકુમાર યાદવ અને રોહિત શર્મા પણ આશ્ચર્યચકિત થઈ ગયા હતા. હાર્દિક પંડ્યા જે રીતે આઉટ થયો તે જોઈને આખું મુંબઈ ડગઆઉટ અવિશ્વાસમાં હતું. કેચ પકડ્યા બાદ શ્રેયસ ઐયરે વાનખેડેના ગ્રાઉન્ડમાં દર્શકો તરફ જોઈને પોતાના કાન તરફ ઈશારો કર્યો હતો, જેનો અર્થ હતો કે તે દર્શકોના વધુ અવાજ અને તાળીઓની અપેક્ષા રાખે છે.
પંજાબ કિંગ્સનો અશ્વમેધ રથ
શ્રેયસ ઐયરની શાનદાર ફિલ્ડિંગ અને ટીમની એકતાને કારણે પંજાબ કિંગ્સે મુંબઈ ઈન્ડિયન્સને 7 વિકેટથી હરાવીને આ સિઝનમાં પોતાની વિજયી કૂચ જારી રાખી છે. પંજાબ કિંગ્સ અત્યાર સુધી રમાયેલી પાંચેય મેચો જીતીને પોઈન્ટ ટેબલમાં ટોચ પર છે અને આ સીઝનની એકમાત્ર અજેય ટીમ બની રહી છે.
આ મેચે સાબિત કરી દીધું છે કે માત્ર બેટિંગ કે બોલિંગ જ નહીં, પણ મેદાન પરની ચપળતા અને શ્રેયસ ઐયર જેવો મજબૂત નિર્ધાર મેચનું પાસું પલટી શકે છે. સચિન તેંડુલકરની આ પ્રશંસા શ્રેયસ ઐયરના આત્મવિશ્વાસમાં મોટો વધારો કરશે તે નક્કી છે.