નવી દિલ્હી : ઈન્ડિયન સુપર લીગ (ISL) માં પંજાબ FC તરફથી રમતા સ્લોવેનિયાના સ્ટાર ફૂટબોલર લુકા મજસેન હાલ પોતાના એક ટેટૂના કારણે ભારતભરમાં ચર્ચાનો વિષય બન્યા છે. લુકાએ પોતાના જમણા હાથ પર ભગવાન ભોલેનાથનું વિશાળ અને અદ્ભુત ટેટૂ બનાવડાવ્યું છે, જેની તસવીર સોશિયલ મીડિયા પર વાયરલ થઈ રહી છે.

35 વર્ષીય સ્ટ્રાઈકર લુકા મજસેને ઈન્સ્ટાગ્રામ પર ટેટૂની તસવીર શેર કરતા કેપ્શનમાં ‘Om Namah Shivaya’ અને ‘Har Har Mahadev’ લખ્યું હતું. ટેટૂમાં ભગવાન શિવનું રૌદ્ર સ્વરૂપ, ત્રિશૂળ, ડમરુ અને ગળામાં સર્પ ખૂબ જ બારીકાઈથી બનાવવામાં આવ્યા છે. પોસ્ટ વાયરલ થતા જ થોડા જ કલાકોમાં 5 લાખથી વધુ લાઈક્સ અને હજારો કોમેન્ટ્સ આવી છે.

ભારતીય ફૂટબોલ ફેન્સ લુકાના આ પગલાથી ખૂબ ખુશ છે. કોમેન્ટમાં લોકો ‘ભારતમાં તમારું સ્વાગત છે’, ‘સાચા શિવભક્ત’, ‘ISL નો સૌથી કૂલ ખેલાડી’ જેવી પ્રતિક્રિયાઓ આપી રહ્યા છે. 

એક ઈન્ટરવ્યુમાં લુકાએ જણાવ્યું હતું કે, "હું છેલ્લા 3 વર્ષથી ભારતમાં છું. અહીંની સંસ્કૃતિ, આધ્યાત્મિકતા અને લોકોનો પ્રેમ મને ખૂબ સ્પર્શી ગયો છે. ભગવાન શિવની શાંતિ અને શક્તિ મને હંમેશા પ્રેરણા આપે છે. એટલે જ મેં આ ટેટૂ બનાવડાવવાનો નિર્ણય લીધો." 

ઉલ્લેખનીય છે કે લુકા મજસેન ISL 2024-25 સીઝનમાં 12 ગોલ સાથે પંજાબ FC માટે સૌથી વધુ ગોલ કરનાર ખેલાડી રહ્યા હતા અને તેઓ ભારતીય ફેન્સમાં ખૂબ લોકપ્રિય છે.