વિન્ડહોક : નામિબિયાના વિન્ડહોક ખાતે રમાયેલી T20I ત્રિકોણીય શ્રેણીની ફાઇનલ મેચમાં દક્ષિણ આફ્રિકાએ ઝિમ્બાબ્વે સામે ૪૮ રને ધમાકેદાર વિજય મેળવીને ચેમ્પિયનશિપની ટ્રોફી પોતાના નામે કરી લીધી છે. પ્રથમ બેટિંગ કરતા દક્ષિણ આફ્રિકાએ ૫ વિકેટના ભોગે ૨૦૫ રનનો પહાડ જેવો સ્કોર ખડક્યો હતો, જેના જવાબમાં ઝિમ્બાબ્વેની આખી ટીમ ૧૮ ઓવરમાં માત્ર ૧૫૭ રન બનાવીને ઓલઆઉટ થઈ ગઈ હતી.

ટોસ જીતીને પ્રથમ બેટિંગ કરવા ઉતરેલી દક્ષિણ આફ્રિકાની ટીમને ઓપનર જોર્ડન હર્મન અને કોનોર એસ્ટરહુઇઝેને વિસ્ફોટક શરૂઆત અપાવી હતી. બંનેએ પ્રથમ વિકેટ માટે ૮૪ રનની ભાગીદારી કરી હતી, જેમાં જોર્ડન હર્મને તેની પ્રથમ T20I ફિફ્ટી (૫૩ રન) ફટકારી હતી. મધ્યમ ક્રમમાં ડેવાલ્ડ બ્રેવિસ (૩૨) અને રૂબિન હર્મને ઝડપી રન બનાવ્યા હતા, જ્યારે અંતમાં ડુઆન જાન્સને માત્ર ૧૪ બોલમાં ૨૩ રનની આક્રમક ઇનિંગ રમીને ટીમને ૨૦૦ રનની પાર પહોંચાડી હતી. ઝિમ્બાબ્વે તરફથી બ્રેડ ઇવાન્સ અને ન્યુમેન ન્યામહુરીએ ૨-૨ વિકેટ ઝડપી હતી.

૨૦૬ રનના વિશાળ લક્ષ્યાંકનો પીછો કરવા ઉતરેલી ઝિમ્બાબ્વેની શરૂઆત અત્યંત ખરાબ રહી હતી. પ્રોટીઝ ઓપનિંગ બોલરો ઇથાન બોશ અને ડુઆન જાન્સને પાવરપ્લેમાં જ ૨-૨ વિકેટો ઝડપીને ઝિમ્બાબ્વેનો સ્કોર ૪ વિકેટે ૪૬ રન કરી દીધો હતો. ત્યારબાદ બજોર્ન ફોર્ટુઇને (૩/૨૪) સિકંદર રઝા અને રાયન બર્લને આઉટ કરીને ઝિમ્બાબ્વેની જીતની તમામ આશાઓ પર પાણી ફેરવી દીધું હતું. ઝિમ્બાબ્વે તરફથી બ્રેડ ઇવાન્સે પોતાની પ્રથમ T20I ફિફ્ટી ફટકારીને ૫૬ રનની અણનમ ઇનિંગ રમી હતી, પરંતુ તે ટીમને હારથી બચાવી શક્યો નહોતો.