રાયપુર:ભારતીય ક્રિકેટ ટીમના સ્ટાર બેટ્સમેન અને 'મિસ્ટર 360' તરીકે જાણીતા સૂર્યકુમાર યાદવ હાલમાં પિતૃત્વનો આનંદ માણી રહ્યા છે. રાયપુર ખાતે રોયલ ચેલેન્જર્સ બેંગલુરુ (RCB) સામેની મહત્વની આઈપીએલ મેચ પહેલા સૂર્યકુમાર યાદવે પોતાની નવજાત પુત્રીના નામની જાહેરાત કરી છે. તેમણે પોતાની લાડકવાઈ પુત્રીનું નામ 'રિદ્ધિમા' રાખ્યું હોવાનું જાહેર કરતા ચાહકો અને રમતજગતમાં ખુશીનો માહોલ જોવા મળી રહ્યો છે.

સૂર્યકુમાર યાદવે આ ખાસ અવસરની ઉજવણી અનોખી રીતે કરી હતી. રાયપુરમાં ટીમની હોટલ બહાર હાજર રહેલા પેપરાઝીઓ અને મીડિયાકર્મીઓનું મોઢું મીઠું કરાવીને તેમણે પોતાની ખુશી વ્યક્ત કરી હતી. સોશિયલ મીડિયા પર વાયરલ થયેલા એક વીડિયોમાં સૂર્યકુમાર યાદવ અત્યંત આનંદિત મુદ્રામાં પેપરાઝીઓને મીઠાઈના બોક્સ વહેંચતા જોવા મળે છે. આ દરમિયાન મીડિયાકર્મીઓએ પણ તેમને પિતા બનવા બદલ અને પુત્રીના સુંદર નામકરણ બદલ હાર્દિક શુભેચ્છાઓ પાઠવી હતી.

ક્રિકેટના મેદાન પર ચોગ્ગા-છગ્ગાની રમઝટ બોલાવનાર સૂર્યકુમાર યાદવ માટે પર્સનલ લાઈફનો આ તબક્કો અત્યંત યાદગાર રહ્યો છે. ઉલ્લેખનીય છે કે, સૂર્યકુમાર અને તેમની પત્ની શ્રીમતી દેવીશા શેટ્ટીના ઘરે થોડા સમય પહેલા જ આ નાનકડી પરીનું આગમન થયું છે. દીકરીના નામની જાહેરાત કર્યા બાદ હવે સૂર્યકુમાર યાદવ ફરી એકવાર મેદાન પર બેટથી ધમાલ મચાવવા માટે તૈયાર છે. રાયપુરના સ્ટેડિયમમાં રમાનારી મેચમાં તે પોતાની પુત્રીને શાનદાર ઈનિંગ ગિફ્ટ કરે તેવી આશા ચાહકો રાખી રહ્યા છે.