ચેન્નાઈ:આઈપીએલ ૨૦૨૬ના ૬૩મા રોમાંચક મુકાબલામાં સનરાઈઝર્સ હૈદરાબાદે ચેન્નાઈ સુપર કિંગ્સને તેના જ ઘરઆંગણે ૫ વિકેટે પરાજય આપીને પ્લેઓફમાં પોતાની જગ્યા પક્કી કરી લીધી છે. હૈદરાબાદની આ શાનદાર જીતની સાથે જ ગુજરાત ટાઈટન્સની ટીમ પણ સત્તાવાર રીતે પ્લેઓફ માટે ક્વોલિફાય થઈ ગઈ છે. આ મેચના પરિણામ સાથે જ પ્લેઓફની ટોપ-૪ ટીમોમાંથી ત્રણ સ્પોટ ફિક્સ થઈ ગયા છે, જ્યારે બીજી તરફ ડિફેન્ડિંગ ચેમ્પિયન ગણાતી ચેન્નાઈ સુપર કિંગ્સની ટીમ પ્લેઓફની રેસમાંથી લગભગ બહાર થઈ ગઈ છે.

હૈદરાબાદે ૧૯ ઓવરમાં લક્ષ્ય હાંસલ કર્યું

ટોસ હારીને પ્રથમ બેટિંગ કરવા ઉતરેલી ઋતુરાજ ગાયકવાડના નેતૃત્વવાળી ચેન્નાઈ સુપર કિંગ્સની ટીમે નિર્ધારિત ૨૦ ઓવરમાં ૭ વિકેટ ગુમાવીને ૧૮૦ રનનો પડકારજનક સ્કોર ઊભો કર્યો હતો. ચેન્નાઈ તરફથી સંજુ સેમસન, કપ્તાન ઋતુરાજ ગાયકવાડ અને શિવમ દુબેએ લડાયક બેટિંગ કરી હતી. ૧૮૧ રનના લક્ષ્યનો પીછો કરવા ઉતરેલી પેટ કમિન્સની કપ્તાની હેઠળની સનરાઈઝર્સ હૈદરાબાદની ટીમે ધમાકેદાર શરૂઆત કરી હતી. અભિષેક શર્મા, ઈશાન કિશન અને હેનરિક ક્લાસેનની આક્રમક બેટિંગના જોરે એસઆરએચએ માત્ર ૧૯ ઓવરમાં ૫ વિકેટના ભોગે ૧૮૧ રન બનાવીને મેચ પોતાના નામે કરી લીધી હતી.

પોઇન્ટ્સ ટેબલનું સમીકરણ બદલાયું

આ મેચ પહેલા ચેન્નાઈ સુપર કિંગ્સની ટીમ ૧૨ મેચમાં ૬ જીત અને ૬ હાર સાથે ૧૨ પોઇન્ટ મેળવીને પાંચમા સ્થાને હતી. સીએસકે પાસે આ મેચ જીતીને ૧૪ પોઇન્ટ સાથે પંજાબ કિંગ્સને પછાડીને ટોપ-૪ માં એન્ટ્રી કરવાની સુવર્ણ તક હતી, પરંતુ આ હાર સાથે તેનું સપનું રોળાઈ ગયું છે. બીજી તરફ, હૈદરાબાદની ટીમ આ મેચ જીતતાની સાથે જ ૧૪ પોઇન્ટથી આગળ વધીને પ્લેઓફની ટિકિટ મેળવવામાં સફળ રહી છે. આ મેચ પૂર્વે નેટ્સમાં મહેન્દ્ર સિંહ ધોનીએ જોરદાર પ્રેક્ટિસ કરી હતી, જેને જોવા સ્ટેડિયમમાં ચાહકો ઉમટ્યા હતા. સીએસકેમાં તેમના ભવિષ્યને લઈને ચાલી રહેલી ચર્ચાઓ વચ્ચે મહેન્દ્ર સિંહ ધોની કદાચ છેલ્લી વાર ચેન્નાઈના મેદાન પર રમતા દેખાયા હોય તેવી અટકળો પણ તેજ થઈ છે.

બંને ટીમોની પ્લેઇંગ ઇલેવન

સનરાઈઝર્સ હૈદરાબાદ: પેટ કમિન્સ (કપ્તાન), અભિષેક શર્મા, ઈશાન કિશન (વિકેટકીપર), હેનરિક ક્લાસેન, સલિલ અરોડા, સ્મરણ રામચંદ્રન, નીતિશ કુમાર રેડ્ડી, શિવાંગ કુમાર, ઈશાન મલિંગા, સાકિબ હુસૈન, પ્રફુલ્લ હિંગે.

ચેન્નાઈ સુપર કિંગ્સ: ઋતુરાજ ગાયકવાડ (કપ્તાન), સંજુ સેમસન (વિકેટકીપર), ઉર્વિલ પટેલ, કાર્તિક શર્મા, ડેવાલ્ડ બ્રેવિસ, શિવમ દુબે, પ્રશાંત વીર, અકીલ હુસૈન, નૂર અહેમદ, અંશુલ કંબોજ, સ્પેન્સર જોન્સન.