મુંબઈ:  ભારતીય ક્રિકેટ જગતમાં હાલમાં એક જ ચર્ચા જોરશોરથી ચાલી રહી છે - શું સૂર્યકુમાર યાદવ ટીમ ઈન્ડિયામાં પોતાનું સ્થાન જાળવી શકશે? ભલે સૂર્યાની આગેવાનીમાં ભારતે T20 વર્લ્ડ કપનો ખિતાબ જીત્યો હોય, પરંતુ ફાઈનલમાં શૂન્ય રને આઉટ થવું અને મોટી મેચોમાં બેટિંગમાં નિષ્ફળતા હવે પસંદગીકારો માટે ચિંતાનો વિષય બની છે. ખાસ કરીને 2025ના વર્ષમાં તેમનો સ્ટ્રાઈક રેટ 120થી નીચે જવો એ સંકેત આપે છે કે હવે માત્ર કેપ્ટનશીપના જોરે ટીમમાં ટકી રહેવું મુશ્કેલ છે. બીસીસીઆઈના સૂત્રો મુજબ, આગામી ઇંગ્લેન્ડ અને આયર્લેન્ડનો પ્રવાસ સૂર્યા માટે અંતિમ તક સામાન હોઈ શકે છે, જ્યાં તેમની કેપ્ટનશીપ કરતા વધુ તેમના બેટિંગ પ્રદર્શનને માઈક્રોસ્કોપ હેઠળ રાખવામાં આવશે.

બીજી તરફ, ટીમ ઇન્ડિયામાં હવે 'યુવા ક્રાંતિ'ની શરૂઆત થઈ રહી છે. 15 વર્ષની નાની ઉંમરે ધૂમ મચાવનાર વૈભવ સૂર્યવંશી જેવા ખેલાડીઓ હવે સિનિયર ટીમના દરવાજા ખખડાવી રહ્યા છે. પસંદગી સમિતિ વૈભવને આયર્લેન્ડ પ્રવાસ પર ડેબ્યૂ કરાવવાની ગંભીરતાથી વિચારણા કરી રહી છે. અભિષેક શર્મા, સંજુ સેમસન અને ઈશાન કિશન જેવા ખેલાડીઓ પહેલેથી જ શાનદાર ફોર્મમાં છે, ત્યારે સૂર્યકુમાર યાદવ માટે 2028ના લોસ એન્જલસ ઓલિમ્પિક સુધી ટીમમાં રહેવું એક મોટો પડકાર છે. જો ઇંગ્લેન્ડ પ્રવાસમાં સૂર્યાનું બેટ શાંત રહેશે, તો અજિત અગરકરની આગેવાની હેઠળની સમિતિ કઠિન નિર્ણય લેતા અચકાશે નહીં.

મુખ્ય કોચ ગૌતમ ગંભીર હાલમાં સૂર્યાને પૂરેપૂરો ટેકો આપી રહ્યા છે, પરંતુ ક્રિકેટમાં આંકડા અને સતત પ્રદર્શન જ સર્વોપરી હોય છે. 2028માં સૂર્યકુમાર 38 વર્ષના થશે, જે ઉંમરે T20 જેવા ફાસ્ટ ફોર્મેટમાં ફિટનેસ અને રિફ્લેક્સ જાળવી રાખવા અત્યંત મુશ્કેલ હોય છે. બોર્ડ હવે એવા ખેલાડીઓને તૈયાર કરવા માંગે છે જે લાંબા ગાળા સુધી ટીમનું ભવિષ્ય બની શકે. આ સ્થિતિમાં, સૂર્યાએ જો પોતાનું સ્થાન બચાવવું હશે તો તેણે માત્ર મેદાન પર કેપ્ટન તરીકે નહીં, પણ જૂના 'ફિયરલેસ' બેટ્સમેન તરીકે પરત ફરવું પડશે. શું સૂર્યા ફરી એકવાર ટીકાકારોના મોઢા બંધ કરશે કે પછી ટીમ ઇન્ડિયામાં નવા યુગની શરૂઆત થશે, તે હવે આવનારો સમય જ કહેશે.