નવી દિલ્હી : ભારત અને ન્યૂઝીલેન્ડ વચ્ચે રમાનારી આગામી ટેસ્ટ શ્રેણીને લઈને ક્રિકેટ રસિકોમાં ભારે ઉત્સાહ જોવા મળી રહ્યો છે. કીવી ટીમ સામે તેમની જ ધરતી પર રમતનું ઉચ્ચ સ્તર પ્રદર્શિત કરવું ભારતીય ખેલાડીઓ માટે હંમેશા એક મોટો પડકાર રહ્યો છે. ન્યૂઝીલેન્ડની ઝડપી અને સ્વિંગ પીચો પર ભારતીય બેટ્સમેનોએ હંમેશા કડક પરીક્ષાનો સામનો કરવો પડ્યો છે. આગામી મુકાબલામાં બંને ટીમો વચ્ચે કાંટાની ટક્કર જોવા મળશે તેવી પૂરી સંભાવના છે.

આંકડાઓ પર નજર કરીએ તો ન્યૂઝીલેન્ડની ધરતી પર ભારતનો ટેસ્ટ રેકોર્ડ બહુ શાનદાર રહ્યો નથી. અત્યાર સુધી રમાયેલી ૧૧ ટેસ્ટ શ્રેણીમાંથી ટીમ ઇન્ડિયા માત્ર બે જ વખત વિજય મેળવવામાં સફળ રહી છે. વર્ષ ૧૯૬૮માં જ્યારે ભારતીય ટીમ પહેલીવાર ન્યૂઝીલેન્ડના પ્રવાસે ગઈ હતી, ત્યારે ચાર મેચોની શ્રેણી ૩-૧થી જીતીને ઇતિહાસ રચ્યો હતો. પરંતુ ત્યારબાદના પ્રવાસોમાં કીવી પરિસ્થિતિઓ ભારતીય ટીમ માટે અનુકૂળ સાબિત થઈ શકી નહોતી.

વર્ષ ૧૯૭૫ની શ્રેણી ડ્રો રહી હતી, જ્યારે ૧૯૮૧ અને ૧૯૯૦માં ભારતીય ટીમને પરાજયનો સામનો કરવો પડ્યો હતો. લાંબા અંતરાલ બાદ વર્ષ ૨૦૦૯માં ભારતે ૩૩ વર્ષની લાંબી રાહ જોયા પછી ન્યૂઝીલેન્ડની ધરતી પર ટેસ્ટ શ્રેણી જીતીને કમાલ કર્યો હતો. તે સિવાય ૨૦૧૪ અને ૨૦૧૯ના પ્રવાસોમાં પણ ભારતીય ટીમને હારનો સામનો કરવો પડ્યો હતો, જે દર્શાવે છે કે કીવી ટીમ સામે તેમના જ ઘરે રમવું કેટલું મુશ્કેલ છે.

ભારત અને ન્યૂઝીલેન્ડ વચ્ચે અત્યાર સુધી કુલ ૬૫ ટેસ્ટ મુકાબલા રમાયા છે, જેમાં ભારતે ૨૨ મેચોમાં જીત મેળવી છે. પરંતુ ન્યૂઝીલેન્ડની સરજમીન પર ભારતીય ટીમ માત્ર પાંચ જ મેચ જીતી શકી છે. ન્યૂઝીલેન્ડે ભારતીય ટીમને પોતાના ઘરમાં ૧૦ વખત હરાવ્યું છે, જ્યારે ૧૦ મુકાબલા અનિર્ણિત એટલે કે ડ્રો રહ્યા છે. વર્લ્ડ ટેસ્ટ ચેમ્પિયનશિપની ફાઇનલ મેચમાં પણ બંને ટીમો વચ્ચે રોમાંચક જંગ જોવા મળ્યો હતો.