ડાકાર, તા. ૧૨ : સેનેગલના ડાકારમાં ચાલી રહેલા સમર યુથ ઓલિમ્પિક્સ ૨૦૨૬માં ભારતના બે યુવા મુક્કાબાજોએ અંતિમ મુકાબલામાં પ્રવેશ કરીને મહત્વપૂર્ણ સિદ્ધિ મેળવી છે. મહિલા ૪૮ કિલોગ્રામ વર્ગમાં ગુંજન અને પુરુષ ૫૦ કિલોગ્રામ વર્ગમાં લૈરેનલાકપમ અંબેકર મીતેઇએ પોતપોતાની સેમિફાઇનલ જીતી ભારત માટે ઓછામાં ઓછા બે ચંદ્રક નિશ્ચિત કર્યા છે.

ગુંજને બ્રિટનની લિલી બેસેટને ૪-૧થી હરાવી અંતિમ મુકાબલામાં સ્થાન મેળવ્યું હતું. હવે સુવર્ણચંદ્રક માટે તેનો મુકાબલો અલ્જીરિયાની બૌથાઇના બેનસલાહ સામે થશે.

બીજી તરફ મણિપુરના અંબેકર મીતેઇએ કોલંબિયાના ઇઝોન જેફ્રી ગાલેઆ અરેવાલોને ૫-૦થી હરાવી અંતિમ મુકાબલામાં પ્રવેશ કર્યો હતો. તેમાં તેનો મુકાબલો આયર્લેન્ડના ક્રિસ્ટિયન જુબાની સામે થશે.

અંબેકર પટિયાલાની રાષ્ટ્રીય રમતગમત સંસ્થા ખાતે તાલીમ મેળવે છે. તેની આ સિદ્ધિ વિશેષ મહત્વ ધરાવે છે, કારણ કે વર્ષ ૨૦૧૦માં શિવ થાપાએ યુથ ઓલિમ્પિક્સના અંતિમ મુકાબલામાં સ્થાન મેળવ્યા બાદ ભારતીય પુરુષ મુક્કાબાજ માટે લાંબી પ્રતીક્ષાનો અંત આવ્યો છે.

બંને ભારતીય ખેલાડીઓ હવે સુવર્ણચંદ્રક માટે મેદાનમાં ઊતરશે. ગુરુવારના અંતિમ મુકાબલા પહેલાં ઉપલબ્ધ અહેવાલો અનુસાર ભારતના બંને ખેલાડીઓએ ઓછામાં ઓછા રજતચંદ્રકની ખાતરી કરી લીધી છે.