વેનકુવર, તા.૦૫: કેનેડા ખાતે રમાઈ રહેલી ‘કેનેડા સુપર60’ નામની ક્રિકેટ ટૂર્નામેન્ટની પ્રથમ સેમિ ફાઇનલ મેચ દરમિયાન રવિવારે ક્રિકેટના મેદાન પર એક અત્યંત અનોખી અને દુર્લભ ઘટના જોવા મળી હતી. મેચ દરમિયાન બોલરે ફેંકેલો બોલ પિચ પર ટપ પડ્યા બાદ એટલો બધો ઉછળ્યો કે તે બેટ્સમેનના બેટને અડિયા વગર સીધો બાઉન્ડરી લાઈનની બહાર જઈને પડ્યો હતો. આ ઘટના જોઈને સ્ટેડિયમમાં હાજર તમામ દર્શકો અને ખેલાડીઓ ચોંકી ગયા હતા. જોકે, બોલ સીધો બાઉન્ડરી બહાર પડ્યો હોવા છતાં અમ્પાયરે તેને સિક્સર આપવાના બદલે નિયમ મુજબ વાઈડ અને બાયના રન આપ્યા હતા.

આ રસપ્રદ કિસ્સો અમેરિકાના ફાસ્ટ બોલર અલી ખાન અને વેસ્ટ ઈન્ડિઝના પૂર્વ વિસ્ફોટક બેટ્સમેન કીરોન પોલાર્ડ વચ્ચેની ઓવરમાં બન્યો હતો. મિસસાઉગા માસ્ટર્સ ટીમ વતી બોલિંગ કરી રહેલા અલી ખાને ટોરોન્ટો સિક્સર્સના બેટ્સમેન પોલાર્ડને ઉશ્કેરવાના હેતુથી એક અત્યંત શોર્ટ પિચ બાઉન્સર ફેંક્યો હતો. આ બોલ ટપ પડ્યા બાદ વિકેટકીપરના માથા પરથી પણ ઉંચેથી પસાર થઈને સીધો બાઉન્ડરી લાઈનની બહાર જઈ પડ્યો હતો, જે જોઈને ફેન્સ પણ આશ્ચર્યચકિત થઈ ગયા હતા.

અમ્પાયરે તુરંત જ આ બોલને વાઈડ જાહેર કર્યો હતો, પરંતુ બોલ સીધો બાઉન્ડરી લાઈનની બહાર પડ્યો હોવા છતાં તેને સિક્સર ગણવામાં આવ્યો ન હતો. અમ્પાયરે વાઈડ બોલનો ૧ રન અને બોલ બાઉન્ડરી બહાર જવાથી 'ચાર બાય' એમ મળીને ટોરોન્ટો સિક્સર્સ ટીમને કુલ ૫ એક્સ્ટ્રા રન એનાયત કર્યા હતા. અમ્પાયરના આ નિર્ણયથી મેદાન પર અને સોશિયલ મીડિયામાં પણ વાઈડ બોલ પર સિક્સર કેમ ન મળી તે મુદ્દે ક્રિકેટ ચાહકો વચ્ચે ભારે ચર્ચા જાગી હતી.

ક્રિકેટના અધિકૃત નિયમોના ગ્રંથ મુજબ, જો બોલ બેટ્સમેનના બેટ અથવા ગ્લોવ્ઝને અડીને સીધો બાઉન્ડરી લાઈનની બહાર (હવામાં) જાય તો જ અમ્પાયર તેને સિક્સર આપી શકે છે. બોલ બેટ્સમેનને અડ્યા વગર સીધો બાઉન્ડરી લાઈનની બહાર પડે તો તેને વાઈડ અથવા બાય ગણવામાં આવે છે અને મહત્તમ 'ચાર બાય' તેમજ વાઈડનો ૧ રન મળી શકે છે. આ જૂના કાયદા અંગે સોશિયલ મીડિયા પર ચાહકોએ ટિપ્પણીઓ કરતા જણાવ્યું હતું કે આધુનિક ક્રિકેટમાં આવા જૂના નિયમો બદલાવા જોઈએ.

રોમાંચક સેમિ ફાઈનલ મેચના પરિણામ અંગે વાત કરીએ તો, ટોરોન્ટો સિક્સર્સ વતી રમતા કીરોન પોલાર્ડે માત્ર ૧૪ બોલમાં ૪ છગ્ગા અને ૩ ચોગ્ગાની મદદથી ૪૦ રન ફટકાર્યા હતા. તેની ટીમ ૧૦ ઓવરમાં ૪ વિકેટે ૧૩૦ રનનો મજબૂત સ્કોર બનાવવામાં સફળ રહી હતી. સામે પક્ષે અલી ખાને ૨ ઓવરમાં ૨ વિકેટ ઝડપી હતી. ૧૩૧ રનના લક્ષ્યાંકનો પીછો કરવા ઉતરેલી મિસસાઉગા માસ્ટર્સની ટીમ ૧૦ ઓવરમાં ૭ વિકેટે ૧૨૧ રન જ બનાવી શકી હતી.

અંતમાં, ટોરોન્ટો સિક્સર્સની ટીમે આ રોમાંચક મેચ ૯ રને જીતીને ટૂર્નામેન્ટની ફાઇનલમાં પ્રવેશ કરી લીધો હતો. આ મેચ જીતવા સાથે જ ટોરોન્ટોની ટીમ ટ્રોફી તરફ આગળ વધી છે, પરંતુ આખી મેચ દરમિયાન અલી ખાનનો વાઈડ બાઉન્સર અને અમ્પાયરનો એક્સ્ટ્રા ૫ રન આપવાનો નિર્ણય જ સમગ્ર ક્રિકેટ જગતમાં ચર્ચાનો મુખ્ય વિષય બની રહ્યો હતો.