અલ અમીરાત (ઓમાન) / નવી દિલ્હી : અન્ડર-૧૯ એશિયા કપ વન-ડે ક્રિકેટ ટૂર્નામેન્ટમાં ભારતીય યુવા ટીમનો દબદબો જોવા મળ્યો છે, જ્યાં શુક્રવારે રમાયેલી મેચમાં ઘાતક બોલરોની શાનદાર કામગીરી બાદ ઓપનિંગ બેટ્સમેનોના તરખાટને કારણે ભારતે નેપાળ અન્ડર-૧૯ ટીમને આસાનીથી હરાવીને ભવ્ય વિજય મેળવ્યો છે.

ભારતીય ક્રિકેટ જગતના દિગ્ગજોના પુત્રોની ઉપસ્થિતિને કારણે આ મેચ વિશેષ આકર્ષણનું કેન્દ્ર બની હતી, જેમાં વિસ્ફોટક બેટ્સમેન વીરેન્દર સેહવાગનો પુત્ર આર્યવીર સેહવાગ અને રાહુલ દ્રવિડનો પુત્ર અન્વય દ્રવિડ (વિકેટકીપર) પણ ટીમનો હિસ્સો રહ્યા હતા, જેમાંથી આર્યવીર સેહવાગે પોતાની બેટિંગથી ક્રિકેટપ્રેમીઓનું દિલ જીતી લીધું હતું.

નેપાળની ટીમ પ્રથમ બેટિંગ કરતા ભારતીય બોલરોના આક્રમણ સામે માત્ર ૧૨૮ રનમાં સમેટાઈ ગઈ હતી, જેમાં દર્શ સોનારના ૪૩ રન સિવાય અન્ય કોઈ બેટ્સમેન ટકી શક્યો નહોતો અને ચાર ખેલાડીઓ ખાતું પણ ખોલાવી શક્યા નહોતા, જ્યારે ભારત તરફથી ઇશાન સૂદે ૧૮ રનમાં ૩ વિકેટ, અર્જુન રાજપૂતે માત્ર ૮ રનમાં ૩ વિકેટ અને યશવીર ગૌડે ૨ વિકેટ ઝડપી હતી, સાથે જ ગુજરાતના મહેસાણામાં જન્મેલા કાવ્ય પરેશ પટેલે પણ એક મહત્વપૂર્ણ વિકેટ મેળવી હતી.

જવાબમાં ૧૨૯ રનના સામાન્ય લક્ષ્યાંકનો પીછો કરવા ઉતરેલી ભારતીય ટીમ માટે કૅપ્ટન-ઓપનર લક્ષ્ય રાયચંદાની (૬૩ બોલમાં અણનમ ૫૩ રન, ૭ ચોગ્ગા) અને આર્યવીર સેહવાગ (૫૨ બોલમાં અણનમ ૭૦ રન, ૪ છગ્ગા, ૭ ચોગ્ગા) ની જોડીએ અત્યંત આક્રમક રમત દાખવીને માત્ર ૧૯.૧ ઓવરમાં જ લક્ષ્ય હાંસલ કરી લીધો હતો.

આ શાનદાર વિજય બાદ હવે ક્રિકેટ જગતની નજર આગામી રવિવારે સવારે ૧૦:૩૦ વાગ્યે શરૂ થનારી ભારત અને પાકિસ્તાનની અન્ડર-૧૯ ટીમો વચ્ચેની મહા-મુકાબલા પર સ્થિર થઈ છે, જ્યાં બંને કટ્ટર હરીફો વચ્ચે રોમાંચક જંગ જોવા મળશે.