ચેસ્ટર-લે-સ્ટ્રીટ : ચેસ્ટર-લે-સ્ટ્રીટ ખાતે રમાયેલી શ્રેણીની પ્રથમ વન-ડે (ODI) મેચમાં ઈંગ્લેન્ડે વિલ જેક્સના યાદગાર ઓલરાઉન્ડ પ્રોફોર્મન્સના બળે શ્રીલંકા સામે ૮૯ રનથી ભવ્ય વિજય મેળવ્યો છે. બેટિંગમાં આક્રમક ૪૬ અણનમ રન બનાવ્યા બાદ બોલિંગમાં માત્ર ૨૨ રન આપીને ૫ વિકેટ ઝડપીને જેક્સે મુલાકાતી ટીમ શ્રીલંકાના મધ્યમ અને નીચલા ક્રમના બેટ્સમેનોની કમર તોડી નાખી હતી.

ઈંગ્લેન્ડે ઊભો કર્યો ૨૬૫ રનનો સન્માનજનક સ્કોર
ટોસ જીતીને પ્રથમ બેટિંગ કરવાનો નિર્ણય લીધા બાદ ઈંગ્લેન્ડની શરૂઆત સ્થિર રહી હતી. કેપ્ટન હેરી બ્રુકે ૬૯ બોલમાં ૬૭ રન બનાવીને આગળથી નેતૃત્વ કર્યું હતું. તેમને અનુભવી બેટ્સમેન જો રૂટ (૪૪ રન) અને વિલ જેક્સ (૪૭ બોલમાં ૪૬* રન) નો ઉત્તમ સાથ મળ્યો હતો.

અંતે ઈંગ્લેન્ડની ટીમ ૪૮.૧ ઓવરમાં ૨૬૫ રને ઓલઆઉટ થઈ ગઈ હતી. શ્રીલંકા તરફથી ડેબ્યૂ કરનાર લેગ-સ્પિનર સચિંદુ કોલમ્બેજે ૪૪ રન આપીને ૩ વિકેટ અને અસિથા ફર્નાન્ડોએ ૫૩ રન આપીને ૩ વિકેટ ઝડપી હતી.

જો રૂટનો ઐતિહાસિક ૨૩,૦૦૦ આંતરરાષ્ટ્રીય રનનો રેકોર્ડ
આ મેચ ઈંગ્લેન્ડના સ્ટાર બેટ્સમેન જો રૂટ માટે ખાસ યાદગાર બની રહી હતી. પોતાની ૪૪ રનની ઇનિંગ દરમિયાન રૂટે ક્રિકેટના તમામ ફોર્મેટમાં મળીને આંતરરાષ્ટ્રીય સ્તરે ૨૩,૦૦૦ રન પૂરા કરવાનો સીમાચિહ્નરૂપ આંકડો પાર કરી લીધો છે.

વિલ જેક્સની સ્પિનની જાળમાં ફસાયું શ્રીલંકા
૨૬૬ રનના વિજયી લક્ષ્યાંકનો પીછો કરવા ઉતરેલી શ્રીલંકન ટીમ એક સમયે ૨૦મી ઓવરમાં ૮૪/૨ ની મજબૂત સ્થિતિમાં હતી. પરંતુ વિલ જેક્સે શાનદાર બોલિંગ સ્પેલ ફેંકીને મેચનું પાસું પલટી નાખ્યું હતું. જેક્સે પોતાની ૭ ઓવરમાં માત્ર ૨૨ રન આપીને ૫ વિકેટ ઝડપી હતી.

શ્રીલંકા તરફથી યુવા ઓલરાઉન્ડર દુનિથ વેલ્લાલાગેએ સર્વોચ્ચ ૪૫ રન અને કુસલ મેન્ડિસે ૪૨ રન બનાવ્યા હતા. ઉપરાંત ઓપનર પાથુમ નિસાંકાએ (૨૭ રન) વન-ડે ક્રિકેટમાં પોતાના ૩,૦૦૦ રન પૂરા કર્યા હતા. જોકે, અન્ય કોઈ બેટ્સમેન ટકી ન શકતા શ્રીલંકાની આખી ટીમ ૩૭ ઓવરમાં ૧૭૬ રનમાં ઓલઆઉટ થઈ ગઈ હતી.

સંક્ષિપ્ત સ્કોરબોર્ડ:
•    ઈંગ્લેન્ડ: ૨૬૫/૧૦ (૪૮.૧ ઓવર) - હેરી બ્રુક ૬૭, વિલ જેક્સ ૪૬*, જો રૂટ ૪૪; સચિંદુ કોલોમ્બેજ ૩/૪૪, અસિથા ફર્નાન્ડો ૩/૫૩.

•    શ્રીલંકા: ૧૭૬/૧૦ (૩૭ ઓવર) - દુનિથ વેલ્લાલાગે ૪૫, કુસલ મેન્ડિસ ૪૨; વિલ જેક્સ ૫/૨૨, જેમી ઓવરટન ૨/૨૧.

•    પરિણામ: ઈંગ્લેન્ડનો ૮૯ રનથી વિજય ('પ્લેયર ઓફ ધ મેચ': વિલ જેક્સ).