આઈપીએલ 2026માં જો કોઈ એક નામ ક્રિકેટ જગતમાં ગુંજી રહ્યું હોય, તો તે છે યુવા વિસ્ફોટક બેટ્સમેન વૈભવ સૂર્યવંશી. પોતાની આક્રમક બેટિંગ શૈલીથી વિરોધી ટીમોના પસીના છોડાવનાર આ ડાબોડી બેટ્સમેન હવે આગામી મેગા ઓક્શનમાં ધનવાન બનવાની તૈયારીમાં છે. હાલમાં એવી અટકળો વહેતી થઈ છે કે વૈભવ પર આગામી ઓક્શનમાં 50 કરોડ રૂપિયા સુધીની ઐતિહાસિક બોલી લાગી શકે છે.

વૈભવ સૂર્યવંશીએ આઈપીએલ 2025માં માત્ર 35 બોલમાં સદી ફટકારીને સૌનું ધ્યાન ખેંચ્યું હતું. આ ફોર્મને જાળવી રાખતા, ચાલુ સીઝન (IPL 2026)માં પણ તેણે માત્ર 36 બોલમાં સદી ઠોકીને પોતાની ક્ષમતા સાબિત કરી દીધી છે. રાજસ્થાન રોયલ્સ માટે ઓપનિંગ કરતા વૈભવે યશસ્વી જાયસ્વાલ સાથે મળીને ટીમની બેટિંગ લાઇનઅપને અત્યંત મજબૂત બનાવી છે.

આઈપીએલ 2027માં મેગા ઓક્શન યોજાવા જઈ રહ્યું છે. નિયમો મુજબ, દરેક ટીમે મોટાભાગના ખેલાડીઓને રિલીઝ કરવા પડશે. જોકે, રાજસ્થાન રોયલ્સ વૈભવને રિટેન કરવા માટે એડીચોટીનું જોર લગાવશે, પરંતુ જો વૈભવ પોતે ઓક્શનમાં જવાનો નિર્ણય લે છે, તો તેના પર બોલીનો નવો રેકોર્ડ સર્જાઈ શકે છે.

સોશિયલ મીડિયા પર વાયરલ થયેલી વિગતો અને કોમેન્ટ્રી દરમિયાન ચર્ચાયેલી વાતો મુજબ, લખનઉ સુપર જાયન્ટ્સના માલિક સંજીવ ગોયન્કા વૈભવને પોતાની ટીમમાં સામેલ કરવા માટે 50 કરોડ સુધીનો ખર્ચ કરવા તૈયાર હોઈ શકે છે. નોંધનીય છે કે ગોયન્કાએ અગાઉ ઋષભ પંત પર 27 કરોડ રૂપિયા ખર્ચ્યા હતા, જે દર્શાવે છે કે તેઓ મેચ-વિનર ખેલાડીઓ માટે મોટી રકમ ખર્ચતા અચકાતા નથી.

આઈપીએલ 2025ના ઓક્શનમાં રાહુલ દ્રવિડના માર્ગદર્શન હેઠળ રાજસ્થાન રોયલ્સે વૈભવને માત્ર 1.10 કરોડ રૂપિયામાં ખરીદ્યો હતો. આજે એ જ રોકાણ સોના જેવું સાબિત થઈ રહ્યું છે.

• IPL 2025: 7 મેચમાં 36ની સરેરાશથી 252 રન (1 સદી, 1 અર્ધસદી).
• IPL 2026 (અત્યાર સુધી): 10 મેચમાં 40.40ની સરેરાશ સાથે કુલ 404 રન.

વૈભવની આ સાતત્યપૂર્ણ બેટિંગ અને આક્રમક અંદાજ તેને આગામી મેગા ઓક્શનનો સૌથી હોટ પ્રોપર્ટી બનાવે છે. જો આ અનુમાન સાચું ઠરશે, તો તે આઈપીએલના ઈતિહાસના તમામ નાણાકીય રેકોર્ડ તોડી નાખશે.