નવી દિલ્હી : મહિલા એશિયા કપ ૨૦૨૬ની ફાઇનલમાં શ્રીલંકાને ધૂળ ચાટતી કરીને સતત આઠમી વખત ટાઇટલ જીતનારી ભારતીય મહિલા ક્રિકેટ ટીમે એશિયન ક્રિકેટ કાઉન્સિલ (ACC) ના પ્રમુખ અને પાકિસ્તાન ક્રિકેટ બોર્ડ (PCB) ના વડા મોહસિન નકવીના હાથે ટ્રોફી સ્વીકારવાનો સાફ ઈનકાર કરી દીધો હતો. આ હાઈ-પ્રોફાઈલ રાજકીય અને રમતગમતના વિવાદ પર મંગળવારે વિદેશ મંત્રાલય (MEA) એ પોતાની પ્રતિક્રિયા આપી છે. દ્વિ-સાપ્તાહિક પ્રેસ બ્રીફિંગ દરમિયાન વિદેશ મંત્રાલયના પ્રવક્તા રણધીર જયસ્વાલે સ્પષ્ટતા કરતા જણાવ્યું હતું કે, પાકિસ્તાની અધિકારી પાસેથી ટ્રોફી ન લેવાનો નિર્ણય સંપૂર્ણપણે 'બોર્ડ ઓફ કંટ્રોલ ફોર ક્રિકેટ ઇન ઇન્ડિયા' (BCCI) ના વહીવટી અધિકારક્ષેત્ર અને નિર્ણયશક્તિ હેઠળ આવે છે.

સરહદ પારથી ફેલાવવામાં આવતા આતંકવાદ સામે ભારતના તાજેતરના સૈન્ય પ્રતિસાદ 'ઓપરેશન સિંદૂર'ના કારણે બંને દેશો વચ્ચે તણાવ ચરમસીમાએ છે. આ જ પૃષ્ઠભૂમિમાં કેપ્ટન હરમનપ્રીત કૌરના નેતૃત્વમાં ભારતીય ટીમે સ્પષ્ટ રાષ્ટ્રીય વલણ અપનાવતા મેચ પછીના પ્રેઝન્ટેશન સમારોહનો બહિષ્કાર કર્યો હતો. શ્રીલંકાની કેપ્ટન ચમારી અથાપથ્થુએ નકવી પાસેથી રનર્સ-અપ ચેક સ્વીકાર્યો હતો, પરંતુ ભારતીય ખેલાડીઓ સ્ટેજ પર ગેરહાજર રહ્યા હતા. પરિણામે, બ્રોડકાસ્ટર્સે ટ્રોફી સેરેમની બતાવવાને બદલે સ્ટુડિયોમાં કવરેજ શિફ્ટ કરવું પડ્યું હતું, જેણે ગયા વર્ષે પુરુષ ટીમે લીધેલા આવા જ આકરા પગલાની યાદ અપાવી દીધી હતી.

જોકે, મેદાન પર ટ્રોફી ન સ્વીકારવા છતાં ભારતીય ટીમે આપસમાં જીતની જોરદાર ઉજવણી કરી હતી. સમારોહ પૂર્વે મુખ્ય કોચ અમોલ મુઝુમદાર અને સંચાલકોએ ટીમને સંબોધિત કરી હતી, જ્યારે બીસીસીઆઈના સેક્રેટરી દેવાજીત સૈકિયા અને વાઈસ પ્રેસિડેન્ટ રાજીવ શુક્લાએ મેચમાં શ્રેષ્ઠ કેચ ઝડપનારી નંદની શર્માને 'ફિલ્ડર ઓફ ધ મેચ'નો મેડલ આપી પ્રોત્સાહિત કરી હતી. સમગ્ર ટુર્નામેન્ટમાં અજેય રહેલી ભારતીય ટીમે ફાઇનલમાં ૧૮૩/૫ નો વિશાળ સ્કોર બનાવી શ્રીલંકાને માત્ર ૧૧૧ રન પર ઓલઆઉટ કરીને ૭૨ રને ભવ્ય વિજય મેળવ્યો હતો.