નવી દિલ્હી, તા.21: ભારતીય ક્રિકેટ ટીમ માટે એક મોટો અને ચિંતાજનક આંચકો સમાન સમાચાર સામે આવ્યા છે. ટીમ ઈન્ડિયાના સ્ટાર ઓલરાઉન્ડર હાર્દિક પંડ્યા પોતાની ગંભીર ફિટનેસ સમસ્યાઓના કારણે હજુ લાંબો સમય ક્રિકેટના મેદાનથી દૂર રહી શકે છે. સતત ઈજાઓનો સામનો કરી રહેલા ૩૩ વર્ષીય હાર્દિક પંડ્યાને હાલમાં પિંડીની અંદરના ભાગે 'સ્ટ્રેસ ઇન્જરી' (Stress Injury) થઈ છે. અગાઉ પીઠની સર્જરી કરાવી ચૂકેલા હાર્દિકને સંપૂર્ણપણે ઈજા મુક્ત થઈને મેદાન પર વાપસી કરતા અંદાજે છ મહિના જેટલો સમય લાગી શકે છે, જેના કારણે તે આગામી આઈપીએલ (IPL 2027) પહેલા પરત ફરે તેવી શક્યતા નહિવત જેવી દેખાઈ રહી છે.

બેંગ્લૂરુ સ્થિત સેન્ટર ઑફ એક્સિલેંસમાં હાલ હાર્દિક પંડ્યાનું રિહેબિલિટેશન (પુનર્વસન) ચાલી રહ્યું છે. પ્રાપ્ત અહેવાલો મુજબ, હાર્દિક આગામી ત્રણ અઠવાડિયા પછી હળવું જોગિંગ શરૂ કરી શકે છે, ત્યારબાદ આગામી આઠ અઠવાડિયા સુધી તેના રનિંગ લોડને તબક્કાવાર વધારવામાં આવશે. હજુ સુધી તેની સંપૂર્ણ ફિટનેસને લઈને કોઈ ચોક્કસ સમયમર્યાદા નક્કી કરવામાં આવી નથી. હાર્દિકે ભારત માટે પોતાની અંતિમ મેચ ટી-20 વર્લ્ડ કપની ફાઈનલ તરીકે રમી હતી, જ્યાં તેણે ન્યૂઝીલેન્ડ સામે અમદાવાદમાં શાનદાર પ્રદર્શન કર્યું હતું.

હાર્દિક પંડ્યાની લાંબી ગેરહાજરીથી ભારતીય ટીમની વર્લ્ડ કપની તૈયારીઓને મોટો ફટકો પડ્યો છે. ટીમમાં હાર્દિક જેવું સંતુલન પૂરું પાડી શકે તેવો બીજો કોઈ પ્રભાવશાળી ઓલરાઉન્ડર ઉપલબ્ધ ન હોવાથી તેની ગેરહાજરી ટીમ માટે ચિંતાનો વિષય બની છે. જોકે, તેની અનુપસ્થિતિમાં નીતીશ કુમાર રેડ્ડીને સતત તકો આપવામાં આવી રહી છે. આવતા વર્ષે ઓક્ટોબર ૨૦૨૭માં રમાનારા વન-ડે વર્લ્ડ કપને હવે એક વર્ષથી પણ ઓછો સમય બાકી રહ્યો છે, ત્યારે પંડ્યાની સમયસર ફિટનેસ ટીમ મેનેજમેન્ટ માટે મોટો પડકાર બની ગઈ છે.

હાર્દિક પંડ્યા માટે આગામી સમયનો માર્ગ અત્યંત પડકારજનક રહેવાનો છે. તેની વર્તમાન રિકવરી ટાઈમલાઈનને ધ્યાનમાં લેતા તે સૈયદ મુશ્તાક અલી ટ્રોફી અને વિજય હઝારે ટ્રોફી જેવી ઘરેલુ ક્રિકેટ સ્પર્ધાઓ પણ રમી શકે તેમ નથી. ભારતીય ટીમ જાન્યુઆરીથી માર્ચ દરમિયાન ઓસ્ટ્રેલિયા સામે ટેસ્ટ શ્રેણી રમવાની છે, પરંતુ હાર્દિક લાંબા સમયથી ટેસ્ટ ક્રિકેટ રમતો નથી. આ તમામ પરિસ્થિતિઓને જોતા એવું સ્પષ્ટ થાય છે કે બધું સમુંસૂતરું પાર ઉતરશે તો જ તે સીધો આગામી આઈપીએલ (IPL) દ્વારા જ મેદાન પર વાપસી કરી શકશે.

ઉલ્લેખનીય છે કે હાર્દિક પંડ્યાએ અત્યાર સુધી પોતાની કારકિર્દીમાં ૧૧ ટેસ્ટ મેચમાં ૫૩૨ રન અને ૧૭ વિકેટ, ૯૪ વન-ડે મેચમાં ૧૯૦૪ રન અને ૯૧ વિકેટ તથા ૧૩૮ ટી-૨૦ આંતરરાષ્ટ્રીય મેચોમાં ૨૨૮૮ રન અને ૧૧૪ વિકેટ ઝડપીને ભારતીય ક્રિકેટમાં અદ્ભુત યોગદાન આપ્યું છે. ચાહકો પ્રાર્થના કરી રહ્યા છે કે તેમનો મનપસંદ ઓલરાઉન્ડર વહેલી તકે સંપૂર્ણ સ્વસ્થ થઈને મેદાન પર પુનરાગમન કરે.