રાજકોટમાં સૌરાષ્‍ટ્ર યુનિ. સહિત અનેક સરકારી સંસ્‍થાનો છે, પણ વાઈબ્રન્‍ટ સમિટનું આયોજન ખાનગી યુનિ.માં કરવું પડ્‍યું, એ દર્શાવે છે કે સરકારને ખુદના તંત્ર પર વિશ્વાસ નથી.

વડાપ્રધાન નરેન્‍દ્રભાઈ મોદીએ જ્‍યારે વાઈબ્રન્‍ટ ગુજરાત સમિટના મંચ પરથી સૌરાષ્‍ટ્રના ઔદ્યોગિક વિકાસને જોઈને તેને ‘મિનિ જાપાન' બનાવવાનું આહ્વાન કર્યું હતું, ત્‍યારે પ્રજામાં એક નવી આશા જાગી હતી. મોદીજીના વૈશ્વિક વિઝનને કારણે રાજકોટના એન્‍જિનિયરિંગ ઉદ્યોગ અને મોરબીના સિરામિક ક્ષેત્રે દુનિયાભરમાં ડંકો વગાડ્‍યો છે તે વાતમાં કોઈ શંકા નથી. પરંતુ કમનસીબી એ છે કે મોદીજીએ જે પ્રગતિનો પાયો નાખ્‍યો હતો, તેના પર ઈમારત ચણવામાં ગુજરાતનું સ્‍થાનિક તંત્ર અને શાસકો સદંતર નિષ્‍ફળ નીવડ્‍યા છે.

છેલ્લા દોઢ દાયકાના શાસન પર નજર કરીએ તો સમજાય છે કે સૌરાષ્‍ટ્રના અમુક ઔદ્યોગિક વિસ્‍તારો ભલે મિનિ જાપાન જેવા દેખાતા હોય, પણ બાકીનું મોટાભાગનું સૌરાષ્‍ટ્ર આજે ‘બિગ અફઘાન' જેવી અરાજકતાનો અનુભવ કરી રહ્યું છે.

આ સ્‍થિતિ માટે ગુજરાત સરકારની નબળી પકડ અને સ્‍થાનિક વહીવટીતંત્રની ઘોર બેજવાબદારી જવાબદાર છે. જ્‍યારે દેશના વડાપ્રધાન સૌરાષ્‍ટ્રને આધુનિકતા તરફ લઈ જવા મથતા હોય, ત્‍યારે અહીંના સ્‍થાનિક નેતાઓ અને ભ્રષ્ટ અધિકારીઓએ પ્રદેશને લુખ્‍ખા તત્‍વો અને માફિયાઓના હવાલે કરી દીધો હોય તેવું લાગે છે. રાજકોટ જેવા શહેરોમાં ધોળે દિવસે થતી ગુનાખોરી અને જામનગર જેવા વિસ્‍તારોમાં ભૂમાફિયાઓનો વધતો આતંક અફઘાનિસ્‍તાનની ટોળકીશાહીની યાદ અપાવે છે. જે તંત્રએ જાપાન જેવી શિસ્‍ત અને સુરક્ષા આપવાની હતી, તે તંત્ર આજે માત્ર કાગળ પરના આંકડાઓમાં જ વિકાસ બતાવી રહ્યું છે. વાસ્‍તવિકતા એ છે કે રસ્‍તાઓ પર ટ્રાફિકનું જંગલરાજ છે અને સામાન્‍ય નાગરિક ડરના ઓથાર હેઠળ જીવી રહ્યો છે.

સૌરાષ્‍ટ્રના વહીવટી માળખામાં બેઠેલા અધિકારીઓની ઉદ્ધતાઈ અને બેદરકારીએ માઝા મૂકી છે. રાજકોટ ગેમઝોન જેવી દુર્ઘટનાઓ એ સાબિત કરે છે કે સ્‍થાનિક તંત્ર માટે સામાન્‍ય માણસના જીવની કોઈ કિંમત નથી. મોદીજીના નામ પર મતો મેળવતા સ્‍થાનિક શાસકો પોતાની જવાબદારી નિભાવવામાં કાયર સાબિત થયા છે. પોલીસ તંત્રથી લઈને મ્‍યુનિસિપલ કોર્પોરેશન સુધી ભ્રષ્ટાચારના મૂળ એટલા ઊંડા ઉતરી ગયા છે કે પ્રજાની સુખાકારીના બદલે માત્ર મળતિયાઓના ખિસ્‍સા ભરાઈ રહ્યા છે.

જો રાજ્‍ય સરકાર અને સ્‍થાનિક વહીવટદારો હજુ પણ નહીં જાગે, તો મોદીજીનું ‘મિનિ જાપાન'નું સપનું આ ‘બિગ અફઘાન' જેવી અંધાધૂંધીમાં કાયમ માટે હોમાઈ જશે.