રાજકોટના રાજકીય ફલક પર અત્‍યારે જંગલેશ્વરના ડિમોલિશનને લઈને અનેક ચર્ચાઓ જાગી છે. મીડિયા જગતનો એક મોટો હિસ્‍સો ઉંડો વિચાર કર્યા વગર એવા તારણો આપી રહ્યો છે કે આ મુદ્દો ભાજપને નડ્‍યો છે. વાસ્‍તવમાં, સત્‍ય તેનાથી સાવ વિપરીત છે. જંગલેશ્વરનું ડિમોલિશન ભાજપને નડ્‍યું નથી, પણ ફળ્‍યું છે. જો આપણે તટસ્‍થ રીતે મૂલ્‍યાંકન કરીએ તો જણાશે કે ભાજપી શાસકોની અન્‍ય કોઈ કામગીરી છેલ્લા સમયમાં ખાસ વખાણવા લાયક રહી નથી. પ્રજામાં અનેક મુદ્દે રોષ હતો અને વહીવટીતંત્રની નિષ્‍ક્રિયતા ઉડીને આંખે વળગતી હતી. આવા નકારાત્‍મક માહોલ વચ્‍ચે માત્ર જંગલેશ્વરનો મુદ્દો જ એકમાત્ર ‘નક્કર' કાર્ય તરીકે ઉભરી આવ્‍યો હતો.

આ ડિમોલિશન કોઈ સામાન્‍ય પ્રક્રિયા નહોતી. તંત્રે સામા પૂરે તરીને, ભારે દબાણ અને વિરોધ વચ્‍ચે પણ આ ઐતિહાસિક કાર્ય પાર પાડ્‍યું હતું. વર્ષોથી જામી ગયેલા ગેરકાયદે દબાણોને હટાવવા માટે જે હિંમત જોઈએ તે ભાજપી શાસકોએ આ વખતે બતાવી હતી. રાજકોટની જનતા શાસકોથી અનેક બાબતે નારાજ હતી, રસ્‍તા, પાણી અને સફાઈ જેવા પ્રશ્નો વિકટ હતા,  છતાં લોકોએ ભાજપને મત આપ્‍યા તેનું મુખ્‍ય કારણ આ મક્કમ નિર્ણય છે. જંગલેશ્વરના ઓપરેશનથી સમગ્ર શહેરમાં એવો સંદેશ ગયો કે સરકાર કાયદો અને વ્‍યવસ્‍થા જાળવવા માટે કોઈ પણ હદ સુધી જઈ શકે છે. આ જ મક્કમતાએ રાજકોટની અન્‍ય બેઠકો પર વિજયનો માર્ગ મોકળો કરી આપ્‍યો હતો.

ભલે ભાજપે ચાર બેઠકો પર પરાજય મેળવ્‍યો હોય, પણ તેની સામે જે પ્રાપ્ત કર્યું છે તે અકલ્‍પનીય છે. એક પક્ષ તરીકે ભાજપે પોતાની ગુમાવેલી પ્રતિષ્ઠા આ એક જ કાર્ય દ્વારા પુનઃસ્‍થાપિત કરી છે. મીડિયા ભલે હાર-જીતના ગણિતમાં અટવાયેલું રહે, પણ જનતાના માનસમાં આ ડિમોલિશન એક શુદ્ધિકરણની પ્રક્રિયા હતી. જે મતો મળ્‍યા છે તે શાસકોની કાર્યક્ષમતાના નહીં, પણ તેમની નીડરતાના છે. રાજકારણમાં જ્‍યારે બધું જ વિરુદ્ધમાં જતું હોય ત્‍યારે આવા જ સાહસિક અને નક્કર કાર્યો જનતાનો વિશ્વાસ જીતવામાં મદદરૂપ થાય છે. એટલે જ કહેવું પડે કે જંગલેશ્વર નડ્‍યું નથી, તે તો ભાજપ માટે જીતનું ભાથું સાબિત થયું છે. આવનારા સમયમાં પણ જો શાસકો આવા જ મક્કમ અને લોકહિતના નક્કર કાર્યો કરતા રહેશે, તો જ તે લાંબો સમય ટકી શકશે. તાર્કિક દ્રષ્ટિએ જોતા આ જીત પાછળનું અસલી કારણ જંગલેશ્વર જ છે.