તમિલનાડુના રાજકારણમાં હાલ જે ભૂકંપ આવ્‍યો છે, તેણે દેશભરના રાજકીય વિશ્‍લેષકોને ચોંકાવી દીધા છે. અભિનેતા વિજયે પોતાની લોકપ્રિયતાના જોરે ચૂંટણી પરિણામોમાં ભારે સપાટો બોલાવ્‍યો છે. જોકે, આ પ્રચંડ લોકપ્રિયતા છતાં સત્તાના સિંહાસન સુધી પહોંચવા માટે હજુ ટાંટિયા ટૂંકા પડી રહ્યા હોય તેવું સ્‍પષ્ટ દેખાય છે. બહુમતીનો જાદુઈ આંકડો સ્‍પર્શવો ‘તમિલગ વેટ્ટરી કઝગમ' માટે હાલ લોઢાના ચણા ચાવવા સમાન સાબિત થઈ રહ્યો છે. આ જંગમાં સૌથી મોટો વળાંક કોંગ્રેસની વિચિત્ર રણનીતિએ લાવ્‍યો છે.

કોંગ્રેસે રાતોરાત પાટલી બદલીને સૌને અચરજમાં મૂકી દીધા છે. વર્ષો જૂની સાથીદાર અને ગઠબંધન ભાગીદાર ડીએમકેનો સાથ અચાનક છોડીને કોંગ્રેસે ટીવીકેને સમર્થન જાહેર કરી દીધું છે. આ આકસ્‍મિક અને ચોંકાવનારા વળાંકથી ડીએમકે છાવણીમાં ભારે રોષ જોવા મળી રહ્યો છે.

એમ.કે. સ્‍ટાલિન અને તેમના વરિષ્ઠ નેતાઓ કોંગ્રેસના આ દગાબાજી ભર્યા પગલાથી લાલઘૂમ છે. જોકે, કોંગ્રેસની અંદર પણ અત્‍યારે બધું સમુંસૂતરૂં નથી. પક્ષના આંતરિક વર્તુળોમાં આ નિર્ણયને લઈને ભારે નારાજગી અને ગણગણાટ છે. ઘણા સ્‍થાનિક નેતાઓનું માનવું છે કે આ પ્રકારની જોખમી રણનીતિ પક્ષના અસ્‍તિત્‍વ માટે ભવિષ્‍યમાં જોખમી સાબિત થઈ શકે છે.

 બીજી બાજુ, તમિલનાડુના ઇતિહાસમાં કયારેય ન બન્‍યું હોય તેવું દ્રશ્‍ય જોવા મળ્‍યું છે. બે કટ્ટર રાજકીય હરીફો ડીએમકે અને અન્નાડીએમકેએ એકબીજાનો હાથ પકડ્‍યો છે. વિજયને સત્તાથી દૂર રાખવા અને નવા રાજકીય પ્રવાહને રોકવા માટે આ બંને કટ્ટર હરીફ પક્ષોએ વિપક્ષી એકતાની તૈયારીઓ તેજ કરી છે. આ ગઠબંધન ગમે ત્‍યારે સરકાર રચવા માટે પોતાનો દાવો રજૂ કરી શકે છે. આ રહસ્‍યમય રાજકીય ખેલથી રાજ્‍યમાં ભારે રોમાંચ અને અચંબો સર્જાયો છે. એક તરફ જનતાનો પ્રિય અભિનેતા વિજય છે, તો બીજી તરફ દાયકાઓનો રાજકીય અનુભવ ધરાવતા જૂના જોગીઓ છે.

જો અભિનેતા વિજય કોઈ પણ રીતે ગઠબંધન કરીને સરકાર રચવામાં સફળ રહે, તો પણ તેને ચલાવવી જરાય સરળ નહીં હોય. તેમની પાસે પોતાની સ્‍પષ્ટ બહુમતી નથી અને મજબૂત વિપક્ષી એકતા ડગલે ને પગલે અવરોધો ઉભા કરશે. કોંગ્રેસની આ બદલાયેલી રણનીતિની પણ આવનારા સમયમાં આકરી કસોટી થવાની છે. શું આ નવો ગઠજોડ ટકી શકશે? તમીલ ફાઈલ્‍સની કહાનીમાં દર કલાકે નવા વળાંકો આવી રહ્યા છે. રાજકીય દાવપેચ અને સત્તાની આ ખેંચતાણમાં હજુ કેટલા રહસ્‍યો ખુલશે તે જોવું ખૂબ જ ઉત્તેજક રહેશે. હવે દડો રાજ્‍યપાલના મેદાનમાં છે, જે નક્કી કરશે કે તમિલનાડુની ગાદી પર ખરેખર કોણ બેસશે. આ લેખ લખાય છે ત્‍યાં સુધી સત્તાનો સંગ્રામ ચરમસીમાએ છે.