Gujarati News

અમદાવાદ તા. ૩ : રસ્‍તા પર કોઈ વાહન સરખું ન ચાલતું હોય કે પછી સાઈડ લાઈટ કોઈ બીજી દીધી હોય અને વાહન કોઈ અન્‍ય દિશામાં ટર્ન લે તો સામાન્‍ય રીતે આપણે ઘણીવાર સાંભળતા હોઈએ છે કે કોઈ લેડિઝ હશે આ રીતે ચલાવે છે, તેમને તો ચલાવતા જ ન આવડે. જોકે હવે સમય આવી ગયો છે કે આ મ્‍હેણું ભાગે અને મહિલાઓ એક ખરાબ ડ્રાઈવ હોય છે તેવી માન્‍યતા તૂટે, આવું અમે એટલા માટે કહી રહ્યા છીએ કે અમદાવાદ પ્રાદેશિક વાહનવ્‍યવહાર કચેરી (RTO)ના ડેટા પરથી જાણવા મળ્‍યું છે કે પુરુષો કરતાં વધુ મહિલાઓ ફોર વ્‍હીલર માટે ઓટોમેટેડ ડ્રાઇવિંગ લાયસન્‍સ ટેસ્‍ટ પાસ કરે છે. ૨૦૧૯માં ૫૪% પુરૂષોની સરખામણીમાં ૬૦% મહિલા ડ્રાઈવરોએ આ ટેસ્‍ટમાં સફળતા મેળવી હતી. આ સંખ્‍યા ૨૦૨૦ માં અનુક્રમે ૫૮% અને ૫૨% હતી, અને ૨૦૨૧ માં અનુક્રમે ૫૧% અને ૫૫% હતી. આ એક પ્રશંસનીય સિદ્ધિ છે કારણ કે સરેરાશ માત્ર ૪૫% ઉમેદવારો પ્રથમ પ્રયાસમાં જ ઓટોમેટેડ ટેસ્‍ટ પાસ કરે છે. ૨૩% જેટલા ઉમેદવારો ત્રણ ટ્રાયલ પછી પરીક્ષા પાસ કરે છે. એવા કિસ્‍સાઓ પણ છે કે જયાં લોકોએ પરીક્ષા પાસ કરવા માટે ચાર, પાંચ અથવા તો છ ટ્રાયલ લીધી હોય અને તેમના ફોર-વ્‍હીલર રસ્‍તા પર ચલાવવા માટે આખરે લાઈસન્‍સ મેળવ્‍યું હોય. અમદાવાદ RTOના એક વરિષ્ઠ અધિકારીએ જણાવ્‍યું હતું કે મહિલાઓ પરીક્ષામાં પુરૂષોની સરખામણીએ વધુ સારું પ્રદર્શન કરે છે કારણ કે તેઓ ડ્રાઇવિંગ કરતી વખતે વધુ સાવધ રહે છે.
ફોર-વ્‍હીલર માટેનું લાઇસન્‍સ મેળવવા માટે, ઉમેદવારે પેરેલલ અથવા બોક્‍સ પાર્કિંગ ટેસ્‍ટ, રિવર્સ પાર્કિંગ ટેસ્‍ટ, ત્‍યારબાદ સ્‍લોપ ડ્રાઇવિંગ ટેસ્‍ટ, સર્પેન્‍ટાઇન ડ્રાઇવિંગ અને સર્પેન્‍ટાઇન રિવર્સ ડ્રાઇવિંગ પાસ કરવી પડે છે. ઉમેદવારે દરેક ટેસ્‍ટ ચોક્કસ સમયમાં પૂર્ણ કરવાની રહે છે. RTOના એક ઉચ્‍ચ અધિકારીએ કહ્યું કે ‘મહિલાઓ તેમની કાર વધુ કાળજીપૂર્વક ચલાવવાનું વલણ ધરાવે છે. તેમાંના મોટા ભાગના સર્પન્‍ટાઈન અથવા રિવર્સ સર્પેન્‍ટાઈન ટેસ્‍ટને ક્‍લીયર કરે છે, જે મોટાભાગના પુરૂષ ડ્રાઈવરો માટે પણ અઘરું બની જતું હોય છે. જો કે, ગ્રેડિયન્‍ટ અથવા સ્‍લોપ ટેસ્‍ટ ઘણીસ્ત્રીઓ માટે મુશ્‍કેલ સાબિત થાય છે કારણ કે તેઓ તેમના વાહનને રોલ ડાઉન થવાથી નિયંત્રિત કરવામાં નિષ્‍ફળ જાય છે.'
અધિકારીઓએ જણાવ્‍યું હતું કે બોક્‍સ અથવા પેરેલલ પાર્કિંગ એ પણ ફોર-વ્‍હીલર ચલાવવાનું લાઇસન્‍સ મેળવવાનો પ્રયાસ કરતા લોકો માટે મુશ્‍કેલ સાબિત થતી ટેસ્‍ટ છે. રસપ્રદ વાત એ છે કે, ડેટામાં એ પણ બહાર આવ્‍યું છે કે ટુ-વ્‍હીલર માટે લાયસન્‍સ ટેસ્‍ટ ક્‍લિયર કરતી વખતે મહિલાઓ એટલી સારી રીતે ધ્‍યાન નથી રાખી શકતી. આ ટેસ્‍ટ ક્‍લિયર કરનારા ૮૩% પુરૂષોની સામે, ૨૦૧૯માં માત્ર ૫૪% મહિલાઓએ જ તેને ક્‍લિયર કરી હતી. ૨૦૨૦માં, આ સંખ્‍યા અનુક્રમે ૮૪% અને ૫૮% હતી અને ૨૦૨૧માં તે અનુક્રમે ૮૫% અને ૫૬% હતી.
‘ટુ-વ્‍હીલર ડ્રાઇવિંગ લાયસન્‍સ ટેસ્‍ટ દરમિયાન ઉમેદવારોએ પગ નીચે કર્યા વિના સર્પેન્‍ટાઇન ટેસ્‍ટ પૂર્ણ કરવાની જરૂરી હોય છે. સંતુલન જાળવવા માટે તેઓ તેમના પગ નીચા કરે છે તેથી અહીં સ્ત્રીઓ ખરાબ પ્રદર્શન કરે છે. ૧૦૦ મહિલાઓમાંથી જેઓ ટેસ્‍ટમાં નાપાસ થાય છે, ૮૦ થી વધુ મહિલાઓ આ કારણથી નાપાસ થાય છે. અમે રસ્‍તા પર વાહન ચલાવતી મહિલાઓમાં પણ આ વર્તનની નોંધ કરીએ છીએ.' તેમ અન્‍ય આરટીઓ અધિકારીએ જણાવ્‍યું હતું. RTO અધિકારીઓએ જણાવ્‍યું હતું કે અંદાજે ૨૦% મહિલાઓ જે ફોર-વ્‍હીલર ટેસ્‍ટ ક્‍લિયર કરે છે તે ટુ-વ્‍હીલર ટેસ્‍ટ ક્‍લિયર કરવામાં નિષ્‍ફળ જાય છે.
ઉલ્લેખનીય છે કે ઓટોમેટેડ ડ્રાઇવિંગ ટેસ્‍ટ સેન્‍ટર મેળવનાર અમદાવાદ ગુજરાતનું પ્રથમ શહેર હતું. આ ટેસ્‍ટ ૨૦૧૧-૧૨ માં પ્રાયોગિક ધોરણે રજૂ કરવામાં આવ્‍યું હતું, અને તારણોના આધારે તેને અન્‍ય કેટલાક જિલ્લાઓમાં લાગુ કરવામાં આવ્‍યું હતું. રાજયમાં હજુ પણ ૧૮ જિલ્લા એવા છે જયાં આ ટેસ્‍ટ ઉપલબ્‍ધ નથી.