Gujarati News

અમદાવાદ : રાજયમાં છેલ્લાં બે વર્ષમાં 13,441 બીપીએલ કાર્ડને એપીએલ કાર્ડમાં તબદીલ કરવામાં આવ્યા છે. જયારે 11,313 બીપીએલ કાર્ડ દેવામાં આવ્યા છે. બીપીએલ માટેનો સર્વે રાજય સરકાર દ્વારા 10 વર્ષથી કરવામાં આવ્યો નથી. જેના કારણે રાજયમાં જરૂરિયાતમંદ ગરીબોની હકીકત સામે આવી નથી અને ગરીબો તેમના હક્કથી વંચિત રહી જતાં હોવાનો આક્ષેપ કોંગ્રેસ તરફથી કરવામાં આવ્યા છે. ત્યાં સુધી કે બીપીએલ કાર્ડને એપીએલ કાર્ડમાં તબદીલ કરવા અને બીપીએલ રેશન કાર્ડને રદ કરવાના કારણે ગરીબોને અનાજ મળવાનું બંધ થયાંનું પણ કોંગ્રેસે જણાવ્યું છે. બીપીએલમાંથી એપીએલમાં તબદીલ થયેલા કાર્ડમાં સૌથી વધુ અરવલ્લીમાં 2167 અને સાબરકાંઠાના 1908 કાર્ડનો સમાવેશ થાય છે. જયારે સૌથી વધુ રાજકોટ અને સુરેન્દ્રનગરમાં 2235 કાર્ડ રદ થયા છે.

રાજયમાં છેલ્લાં બે વર્ષ દરમિયાન કેટલાં એપીએલ તથા કેટલાં લોકો બીપીએલ કાર્ડ હોલ્ડર છે વગેરે કોંગ્રેસના ધારાસભ્યો દ્રારા વિધાનસભામાં પ્રશ્નો કરવામાં આવ્યા હતા. જેમાં રાજયના અન્ન અને નાગરિક પુરવઠા તથા ગ્રાહક બાબતના મંત્રીએ જવાબો આપ્યા છે. આ જવાબોને સંકલિત કરીને કોંગ્રેસ દ્રારા વિગતો જાહેર કરવામાં આવી છે.