Gujarati News

ટોક્યો, તા.૨ : ચાર વર્ષ પહેલા જ્યારે શોર્ડ માર્જીનને ભારતીય મહિલા હોકી ટીમની કમાન સોંપવામાં આવી હતી ત્યારે સ્થિતિ સરળ નહોતી. તે સમયે ભારતીય ટીમ પહેલી વાર ઓલિમ્પિક રમીને પાછી ફરી હતી. મેચમાં પ્લેયર્સે હારનો સામનો કરવો પડ્યો હતો અને અનેક સીનિયર પ્લેયર્સે નિવૃત્તિનો નિર્ણય લીધો હતો. ટીમને ફરીથી ઉભી કરવાની જરુર હતી અને મારજેને આ કામ ઘણી સારી રીતે કર્યું. આજે ટોક્યો ઓલિમ્પિક્સમાં ઓસ્ટ્રેલિયા જેવી મજબૂત ટીમને ભારતીય ટીમે હરાવી છે અને તેનો શ્રેય કોચ માર્જિનને પણ જાય છે. માર્જિને આ ટીમને તૈયાર કરી છે.

ઉલ્લેખનીય છે કે માર્જિન પોતે ૧૦ વર્ષ સુધી ફીલ્ડ હોકી રમ્યા છે. તેમણે ભારતની મહિલા હોકી ટીમ સિવાય પુરુષ ટીમને પણ ટ્રેનિંગ આપી છે. તેમને ૨૦૧૭માં ભારતીય મહિલા હોકી ટીમના કોચ બનાવવામાં આવ્યા હતા. તેમના માટે આ નેતૃત્વ એક પડકાર સમાન હતું. તેઓ મોટિવેશનલ સ્પીકર પણ છે, તો લોકોના જુસ્સાને કઈ રીતે વધારવો તે ઘણી સારી રીતે જાણે છે. જુસ્સાની સાથે પ્લેયર્સમાં સ્કિલ્સ સુધારવા માટે તેમણે એક પ્લાન તૈયાર કર્યો.

ભારતીય હોકી ટીમની આ તૈયારીને લોકો બોલિવૂડ ફિલ્મ ચક દે ઈન્ડિયા સાથે જોડે છે. અહીં પણ કોચે પ્લેયર્સના માઈન્ડસેટને બદલવાનું કામ કર્યું. આજની જીત પછી લોકો શોર્ડને રિયલ લાઈફ કબીર ખાન કહી રહ્યા છે. કોચ શોર્ડ ઈચ્છતા હતા કે પ્લેયર્સ મેચમાં કોઈ પણ સમયે જુસ્સો ઓછો ના કરે. પ્લેયર્સને તૈયાર કરવામાં ચોક્કસપણે સમય લાગે છે પરંતુ પરિણામ આપણી સામે છે.

શોર્ડની પદ્ધતિ અન્ય કોચ કરતાં અલગ છે. તેઓ પિચ પર લીડર્ની હાજરીને મહત્વ આપે છે. કોચ વિષે ગરજીત કૌરે ઓલિમ્પિક ડોટ કોમને કહ્યું કે, દરેક કોચની સ્ટાઈલ અને નેચર અલગ અલગ હોય છે. તે પ્લેયર્સ સાથે અલગ અલગ પદ્ધતિથી કામ કરે છે. તે ઈચ્છે છે કે અમે સમસ્યાઓનું નિરાકરણ જાતે શોધીએ. તેઓ ચોક્કસપણે પિચ પર અમારી મદદ કરે છે પરંતુ રસ્તા શોધવાની જવાબદારી અમારી હોય છે.

ઉલ્લેખનીય છે કે શોર્ડ કોચ બન્યા પછી ભારતીય ટીમના પ્રદર્શનમાં ઘણો સુધારો જોવા મળ્યો છે. ભારતીય હોકી ટીમે ઓલિમ્પિક ચેમ્પિયન ગ્રેટ બ્રિટેનની ટીમને તેમના જ દેશમાં હાર આપી હતી. આ સિવાય વર્લ્ડ કપમાં બ્રોન્ઝ મેડલ જીતનાર સ્પેનને પણ ટક્કર આપી હતી. ઓલિમ્પિક્સ ગેમની શરુઆત પહેલા માર્જીને કહ્યુ હતું કે, બે-ત્રણ વર્ષ પહેલા ટીમ જલ્દી હાર માની લેતી હતી પરંતુ હવે તેઓ એકબીજા સાથે વાત કરે છે અને મેચને બદલી કાઢે છે. તેમની મેન્ટલ હેલ્થ ઘણી સુધરી છે. આ જ મેન્ટલ ટફનેસની મદદથી ટીમ ઓલિમ્પિકમાં સેમીફાઈનલ સુધી પહોંચી ગઈ છે. એકબીજા સાથે જેટલા વધારે રહીશું, તેટલું સારું પ્રદર્શન કરી શકીશું.