નવી દિલ્હી, તા.૪: ગુજરાત વિધાનસભાની ચૂંટણી ભાજપ માટે ખૂબ મહત્વની છે. વડા પ્રધાન નરેન્દ્રભાઇ મોદીના ગૃહ રાજયમાં, પાર્ટીનો સતત છ ચૂંટણી જીતવાનો અને છેલ્લા ૨૭ વર્ષથી સત્તામાં રહેવાનો રેકોર્ડ છે. દેખીતી રીતે પાર્ટી આ વલણ ચાલુ રાખવા માંગશે. ચૂંટણી પછી ઘટતી બેઠકોની સંખ્યા અને રાજયમાં નબળી નેતાગીરી એ ભાજપની મુખ્ય ચિંતા છે, ત્યારે પીએમનો ચહેરો, છૂટાછવાયા વિપક્ષો અને ત્રિકોણીય હરીફાઈની શક્યતા તેની તાકાત છે.
૨૦૧૪માં પીએમ મોદીએ ગુજરાત છોડ્યાના આઠ વર્ષ પછી પણ પાર્ટી રાજયમાં મજબૂત નેતૃત્વ બનાવી શકી નથી. મજબૂત નેતૃત્વની શોધમાં, પાર્ટીએ છ વર્ષમાં રાજયને ત્રીજો મુખ્યમંત્રી આપવો પડ્યો. વાસ્તવિકતા એ છે કે આટલા લાંબા સમય પછી પીએમ મોદી રાજયમાં પાર્ટીનો એકમાત્ર ચહેરો છે. ચૂંટણી જીતવાની સમગ્ર જવાબદારી પીએમ મોદીના ખભા પર છે.
પાર્ટી ૧૯૯૫ થી સતત રાજયમાં સત્તામાં છે. ગોધરા ઘટનાના પડછાયામાં યોજાયેલી ૨૦૦૨ની ચૂંટણીને બાદ કરતાં આ સમયગાળા દરમિયાન યોજાયેલી છ ચૂંટણીમાંથી પાંચમાં પક્ષની બેઠકો ઘટી છે. ૧૯૯૫માં પહેલીવાર પોતાના દમ પર સત્તામાં આવેલી પાર્ટીને ૧૨૧ બેઠકો મળી હતી. આ પછી વર્ષ ૧૯૯૮, ૨૦૦૭, ૨૦૧૨ અને ૨૦૧૭માં પાર્ટીની સીટો ઘટતી રહી. છેલ્લી વિધાનસભાની ચૂંટણીમાં પહેલીવાર પાર્ટી સો બેઠકોના આંકડાને પણ સ્પર્શી શકી નથી.
છેલ્લી ચૂંટણીમાં હાર્દિક પટેલ, અલ્પેશ ઠાકોર અને જિજ્ઞેશ મેવાણીની ત્રિપુટીએ ભાજપને બેકફૂટ પર મૂકી દીધું હતું. જોકે, ભાજપ આ ત્રણેયને તોડવામાં સફળ રહ્યું હતું. ચૂંટણી બાદ કોંગ્રેસમાં જોડાનાર હાર્દિક, અલ્પેશે ભાજપમાં પ્રવેશ કર્યો. દાયકાઓમાં આ પહેલીવાર છે જયારે કોંગ્રેસ તેના સૌથી મોટા વ્યૂહરચનાકાર અહેમદ પટેલની ગેરહાજરીમાં ચૂંટણી લડી રહી છે.
૨૦૧૭ની ચૂંટણીમાં ભાજપને ૪૯.૦૫્રુ મતો સાથે ૯૯ બેઠકો મળી હતી જયારે કોંગ્રેસને ૪૨.૯૭% મતો સાથે ૭૭ બેઠકો મળી હતી. બાદમાં પક્ષપલટાને કારણે કોંગ્રેસની સીટો ઘટીને ૬૨ થઈ ગઈ હતી, જયારે ભાજપની સીટો વધીને ૧૧૧ થઈ ગઈ હતી. રાજયમાં ભાજપે સતત ૬ વખત વિધાનસભાની ચૂંટણી જીતી છે.
ચૂંટણી પંચની તારીખોની જાહેરાત કરતી વખતે, સીઈસીએ સંકેત આપ્યો હતો કે ચૂંટણીની જાહેરાત બે દિવસ અગાઉ થઈ શકી હોત, પરંતુ પુલ તૂટી પડવાની દુર્ઘટનાને કારણે તેમાં વિલંબ થયો હતો. મુખ્ય ચૂંટણી કમિશનર રાજીવ કુમારે જણાવ્યું હતું કે, કમિશન એ પણ તપાસ કરશે કે મોરબી દુર્ઘટનાનો તપાસ અહેવાલ જાહેર થવાથી ચૂંટણીમાં ભાગ લેનારા પક્ષોને સમાન તક મળવામાં કોઈ ફરક પડશે કે કેમ. હાલ મોરબી વિધાનસભા બેઠકનું પ્રતિનિધિત્વ ભાજપના બ્રિજેશ મેરજા કરી રહ્યા છે. આ વિસ્તારમાં પ્રથમ તબક્કાનું મતદાન ૧ ડિસેમ્બરે યોજાશે.
કોંગ્રેસ પાર્ટીના ગુજરાત પ્રભારી રઘુ શર્માએ નવી દિલ્હીમાં કહ્યું કે, હિમાચલ અને ગુજરાતની ચૂંટણી અલગ-અલગ શા માટે જાહેર કરવામાં આવી તેનો જવાબ પંચે આપવો જોઈએ. જેના કારણે ભાજપને સરકારી પૈસા પર અનેક કાર્યક્રમો કરવાની તક મળી.
ગુજરાત વિધાનસભાની ચૂંટણીમાં વડાપ્રધાન નરેન્દ્રભાઇ મોદી ભાજપનો ચહેરો હશે, જયારે ગૃહમંત્રી અમિત શાહ મુખ્ય રણનીતિકાર હશે. પીએમ મોદી રવિવારે ત્રણ રેલીઓ દ્વારા ચૂંટણી પ્રચારની શરૂઆત કરશે, જયારે શાહ ગુજરાતમાં રહીને ચૂંટણી રણનીતિની કમાન સંભાળશે.
મતદાન પહેલા પીએમ મોદી ઓછામાં ઓછા પાંચ વખત રાજયની મુલાકાત લેશે. તેઓ દરેક પ્રવાસમાં ઓછામાં ઓછી ત્રણ રેલીઓને સંબોધિત કરશે. આ ઉપરાંત ચૂંટણી પ્રચારના છેલ્લા તબક્કામાં પસંદગીના વિસ્તારોમાં રોડ શો પણ કરવામાં આવશે. રવિવારે પીએમ ભાવનગર, વલસાડ અને સુરેન્દ્રનગરમાં ચૂંટણી રેલીઓ કરશે. આ વિસ્તારોમાં પ્રથમ તબક્કામાં મતદાન થવાનું છે.
.png)
છેલ્લા 8 દિવસમાં સૌથી લોકપ્રિય
સૌરાષ્ટ્ર કચ્છ
સમાચાર ગુજરાત
દેશ-વિદેશ
ખેલ-જગત
ફિલ્મ જગત