Gujarati News

મુંબઇઃ મુંબઇ હાજી અલી દરગાહ ઉપર આતંકવાદી હૂમલો કરવાની ધમકી મળતા પોલીસે દોડધામ શરૂ કરી છે. ફોન કરનારનો મોબાઇલ સ્વીચ અોફ આવતા કોલ ડિટેઇલના આધારે જુદી-જુદી દીશામાં પોલીસે તપાસનો ધમધમાટ શરૂ કર્યો છે.
મુંબઈ પોલીસના કંટ્રોલ રૂમને કોલ પર મુંબઈની હાજી અલી દરગાહ પર આતંકવાદી હુમલાની ધમકી મળી છે. આ કોલ બાદ તારદેવ પોલીસ ઘટનાસ્થળે પહોંચી અને હાજી અલી દરગાહને એલર્ટ કરી દેવામાં આવી છે. એક BDDS અને કોન્વેન્ટ વાન પણ સ્થળ પર રવાના કરવામાં આવી હતી. આ દરમિયાન આ વિસ્તારમાં એલ એન્ડ ટીના પ્રોજેક્ટ સાઈટની તપાસ કરવામાં આવી હતી. જોકે, ટીમના હાથે હજુ સુધી કંઈ લાગ્યું નથી.
સૂત્રોએ જણાવ્યું કે જ્યારે પોલીસે ફોન કરનારને ફરીથી ફોન કર્યો તો તેનો ફોન સ્વીચ ઓફ હતો. ફોન કરનાર કોણ હતો અને કોલ કરવા પાછળનું કારણ શું હતું તે અંગે પણ તપાસ કરવામાં આવી રહી છે. અત્યાર સુધી તે જાણવા મળ્યું છે કે ફોન કરનાર ઉલ્હાસનગરનો છે અને તે માનસિક રીતે બીમાર હોવાનું કહેવામાં આવી રહ્યું છે. તેની સારવાર પણ ચાલી રહી છે.
આ પહેલા 20 ઓગસ્ટે મુંબઈ પોલીસના ટ્રાફિક કંટ્રોલ રૂમને આતંકી હુમલાની ચેતવણી મળી હતી. મુંબઈના સીપી વિવેક ફણસાલકરે જણાવ્યું હતું કે મોડી રાત્રે મુંબઈમાં ટ્રાફિક પોલીસ કંટ્રોલને કેટલાક મેસેજ મળ્યા હતા, જેમાં આતંક ફેલાવવાની ધમકી આપવામાં આવી રહી હતી.
આ સંદેશાઓમાં ઉદયપુર અને અમરાવતીની ઘટનાઓનો ઉલ્લેખ કરીને ભારતમાં 26/11ની ઘટનાનું પુનરાવર્તન કરવાનું કહેવામાં આવ્યું હતું. મેસેજમાં લખવામાં આવ્યું છે કે જો તમે આ નંબરને ટ્રેસ કરશો તો તે બહારનો નિકળશે, પરંતુ મુંબઈમાં બ્લાસ્ટ કરનારા લોકો ઝડપી પહોંચવાના છે.