Gujarati News

નવી દિલ્હી, તા.૧૨: આસામમાં ચોરીની એક વિચિત્ર અને રમૂજી ઘટના સામે આવી છે. એક ઘરમાં ચોરી કરવા દરમિયાન ચોરને પોતાના માટે ખિચડી બનાવવી ભારે પડી ગઈ અને તે આસામ પોલીસના હાથે ઝડપાઈ ગયો. એ માણસ દ્યરમાં કિંમતી વસ્તુઓ ચોરવાના ઈરાદે ઘૂસ્યો હતો, પણ એ દરમ્યાન તે રસોડામાં ગયો અને પોતાના માટે ખિચડી બનાવવા લાગ્યો. રિપોર્ટ મુજબ, ગુવાહાટી પોલીસે  કહ્યું છે કે એ માણસની ધરપકડ કરી લેવામાં આવી છે.

આસામ પોલીસે ટ્વિટર પર આ ઘટનાને રમૂજી અંદાજમાં જણાવી હતી. આસામ પોલીસે લખ્યું કે, ખિચડી ચોરનો વિચિત્ર કેસ! સ્વાસ્થ્યના અઢળક લાભ હોવા છતાં, એવું સામે આવ્યું છે કે ચોરી દરમ્યાન ખિચડી બનાવવી એ તમારા આરોગ્ય માટે હાનિકારક બની શકે છે. આ ચોર પકડાઈ ગયો છે અને ગુવાહાટી પોલીસ તેને ગરમાગરમ ભોજન પીરસી રહી છે.

એક અહેવાલ મુજબ આ દ્યટના દિસપુર પોલીસ સ્ટેશન હેઠળની છે અને એ ઘર, જયાં ચોરી થઈ હતી એ હેંગેરાબારી વિસ્તારમાં આવેલું છે.

ચોરી કરવાના ઈરાદે આવેલા એ માણસે જયારે કિચનમાં ખિચડી બનાવવાનું શરુ કર્યું, તો આજુબાજુના લોકો સાવધ થઈ ગયા અને પોલીસને બોલાવી લીધી હતી. એ ચોર ખિચડી બનાવતો હતો એ દરમ્યાન જ પકડાઈ ગયો!

આસામ પોલીસની ટ્વિટ બાદ અન્ય ટ્વિટર યુઝર્સ પણ આ ઘટનાની મજા લઈ રહ્યા છે. તો અમુક યુઝરે લખ્યું કે, એ માણસે ચોરી દરમ્યાન ખિચડી બનાવી એટલે તેને ખરેખર ભૂખ લાગી હશે.